Read La Bible en Malgache Ohabolana 18 Bible Online

Ohabolana 18 - La Bible en Malgache bible

Ohabolana 18

¹Izay mitokantokana dia mitady ny mahafinaritra ny tenany ihany; misafoaka manohitra izay hevitra mahasoa rehetra izy.

²Ny adala dia tsy mba finaritra amin’ny fahalalana fa ta haneho izay ao am-pony.

³Raha avy ny ratsy fanahy dia avy ny fanamavoana, ary miaraka amin’ny fahafaham-baraka ny henatra.

⁴Rano lalina ny teny aloaky ny vavan’ny olona ary rano miboiboika ny loharanon’ny fahendrena.

⁵Tsy mety ny manohana ny ratsy fanahy mba handresena ny marina amin’ny fitsarana.

⁶Ny molotry ny adala dia miteraka ny fifandirana ary ny teny ataony dia mihantsy fifamelezana.

⁷Ny tenin’ny adala no fandringanana azy ary ny molony ihany no fandriky ny tenany.

⁸Ny tenin’ny mpifosafosa dia toy ny hanim-py ka mikorotsaka hatrany anaty rehetra any.

⁹Izay malaina amin’ny asany dia rahalahin’ny mpanimba zavatra.

¹⁰Ny anaran’NY TOMPO dia tilikambo mafy; ny marina mihazakazaka mankao aminy ka tsy misy mahakasika azy.

¹¹Ny harenan’ny mpanankarena no tanànany mafy ary araka ny fiheviny dia toa manda avo erỳ izany.

¹²Ny fireharehan’ny fon’ny olona dia mialoha ny faharavana, fa ny fanetren-tena kosa mialoha ny voninahitra.

¹³Izay mamaly teny mbola tsy re dia hadalana sy henatra ho an’ny tenany izany.

¹⁴Ny fanahin’ny olona dia mampahery azy ao anatin’ny aretiny, fa raha ny fanahy no kivy, iza indray no hanohana azy?

¹⁵Ny fon’ny manan-tsaina mikatsaka fahalalana ary ny sofin’ny hendry mitady izany.

¹⁶Ny fanomezana ataon’ny olona dia manalalaka ny alehany hahatonga azy eo anatrehan’ny lehibe.

¹⁷Izay mandahatra aloha no toa marina, fa nony avy kosa ny an-daniny dia mitaky porofo aminy.

¹⁸Ny fanaovana antsapaka dia mampitsahatra ady ary mampisaraka ny samy mahery.

¹⁹Ny manatona rahalahy voaisy ratsy dia sarotra noho ny mahazo vohitra mafy ary ny fifandirana dia tahaka ny hidin’ny lapan’ny mpanjaka.

²⁰Ny vokatry ny tenin’ny olona no mahavoky ny kibony, eny, ny vokatry ny molony no mahavoky azy.

²¹Ny mahafaty sy ny mahavelona dia samy hain’ny lela, koa izay tia azy dia hihinana ny vokany.

²²Izay lehilahy mahazo vady dia mahazo hasambarana sady mahita sitraka amin’NY TOMPO.

²³Fitarainana no ataon’ny mahantra, fa ny mpanankarena dia mamaly amin’ny teny mahery.

²⁴Misy sakaiza izay mitondra amin’ny fahoriana, fa misy kosa sakaiza tia, izay mifikitra mafy noho ny rahalahy aza.