Read La Bible en Malgache Ohabolana 19 Bible Online

Ohabolana 19 - La Bible en Malgache bible

Ohabolana 19

¹Tsara ny mahantra mandeha tsy misy tsiny noho izay mandainga amin’ny molony sady adala.

²Tsy tsara ny tsy mamantatra ny tena, fa izay mirotoroto manao zavatra dia ho diso lalana.

³Ny hadalan’ny olona no manimba ny alehany ka amin’NY TOMPO no sosotra ny fony.

⁴Mahamaro sakaiza ny harena, fa ny mahantra dia afoin’ny sakaizany.

⁵Ny vavolombelona mandainga dia tsy ho afa-tsiny ary tsy ho afa-maina izay mamoaka lainga.

⁶Maro no mandambolambo mpanapaka ary ny olona rehetra dia samy misakaiza amin’izay mpanome zavatra.

⁷Ny mahantra dia halan’ny rahalahiny rehetra, koa mainka va ny sakaizany tsy hanalavitra azy? Rehefa manjohy azy amin’ny teny izy dia tsy eo intsony ireo.

⁸Izay mihary fahendrena dia tia ny tenany ary izay mitandrina fahalalana no hahita soa.

⁹Tsy ho afa-tsiny ny vavolombelona mandainga ary ho levona ny miteny lainga.

¹⁰Tsy mendrika ho an’ny adala ny ho velona amin’ny fahafinaretana, koa mainka fa ny mpanompo no hifehy ny zanak’andriana.

¹¹Ny fahendren’ny olona dia manindry ny fahatezerany ary voninahitra ho azy ny tsy mamaly fahadisoana.

¹²Ny fahatezeran’ny mpanjaka dia toy ny fieron’ny liona tanora, fa toy ny ando amin’ny ahitra kosa ny fankasitrahany.

¹³Mahabe fahoriana ny rainy ny zanaka adala ary ny ady ataon’ny vehivavy dia toy ny rano mitete tsy mitsahatra.

¹⁴Trano sy harena no lova avy amin’ny ray, fa ny vady hendry kosa dia avy amin’NY TOMPO.

¹⁵Ny hakamoana dia mahasondrian-tory ary ho mosarena ny olona malaina.

¹⁶Izay mitandrina ny didy dia mitandrina ny ainy, fa izay tsy mihevitra ny alehany dia ho faty.

¹⁷Izay miantra ny malahelo dia mampisambotra amin’NY TOMPO, Izy no hanome izay valisoa tokony ho azy.

¹⁸Anaro ny zanakao fa mbola misy azo antenaina ihany, nefa aza dia entim-po loatra, fandrao mahafaty azy.

¹⁹Izay entim-pahatezerana dia tsy maintsy mandoa ny simba amin’izany; fa raha afahanao izy dia mbola hanampy fahasahiranana ho azy indray ianao.

²⁰Henoy ny saina atolotra anao, ary raiso ny fananarana mba ho hendry ianao amin’ny manaraka.

²¹Maro ny hevitra ao am-pon’ny olona, fa ny fikasan’NY TOMPO no mitoetra.

²²Izay irina amin’ny olona dia ny hatsaram-panahiny ary aleo ho mahantra toy izay ho mpandainga.

²³Ny fahatahorana NY TOMPO no ahazoana fiainana; izay manana izany dia tsy mba handry fotsy sady tsy hiharan-doza.

²⁴Ny malaina dia mangarona ny eo an-dovia amin’ny tanany, nefa ny hampakatra azy ho ao am-bavany tsy ataony.

²⁵Kapohy ny mpaniratsira dia ho hendry ny kely saina ary anaro ny manan-tsaina dia hahalala fahendrena izy.

²⁶Izay mandroba an-keriny ny rainy sy mandroaka ny reniny dia zanaka mahamenatra sy mahafa-baraka.

²⁷Anaka, mitsahara ange tsy hihaino fampianarana, dia hirenireny lavitra ny fahalalana ianao.

²⁸Maniratsira ny fitsarana ny vavolombelona ratsy, ary ny vavan’ny ratsy fanahy dia mitelina ny ratsy.

²⁹Vonona ho an’ny mpaniratsira ny fanamelohana, ary ny kapoka dia ho an’ny lamosin’ny adala.