Read La Bible en Malgache Ohabolana 2 Bible Online

Ohabolana 2 - La Bible en Malgache bible

Ohabolana 2

¹Anaka, raha raisinao ny teniko, ary raketinao ao am-ponao ny didiko

²ka atongilanao ho amin’ny fahendrena ny sofinao, ary atodikao ho amin’ny fahalalana ny fonao;

³eny, raha miantso ny fahalalana ianao, ary manandratra ny feonao mba hahazo fahaiza-mandinika,

⁴raha mitady azy toy ny fitady volafotsy ianao, ary mikatsaka azy toy ny fikatsaka harena miafina,

⁵dia ho fantatrao marina ny fahatahorana NY TOMPO, ary ho hitanao ny fahalalana an’Andriamanitra.

⁶Fa NY TOMPO no manome fahendrena; avy amin’ny teniny no iavian’ny fahalalana sy ny fahiratan-tsaina.

⁷Mitahiry fanambinana ho an’ny mahitsy fo Izy, ary ampinga ho an’izay mandeha tsy misy tsiny;

⁸mitandrina ny lalan’ny fahamarinana Izy, ary miaro ny lalan’ny olony masina.

⁹Amin’izay dia ho fantatrao ny fahamarinana sy ny rariny ary ny hitsiny, dia ny lalana tsara rehetra.

¹⁰Raha tafiditra ao am-ponao ny fahendrena, ary mamin’ny fanahinao ny fahalalana

¹¹dia hiaro anao ny fahaiza-mandinika, ary hiambina anao ny fahalalana

¹²ka hamonjy anao amin’ny lalan-dratsy sy amin’ny lehilahy miteny fitaka,

¹³amin’izay mahafoy ny lalana mahitsy ka mizotra ho amin’ny lalan’ny fahamaizinana,

¹⁴dia izay faly hanao ratsy sady mibitaka amin’ny fanaovam-pitaka,

¹⁵dia izay miolikolika lalana sy maniasia amin’ny alehany;

¹⁶hanafaka anao amin’ny vehivavy jejo koa izany, dia amin’ny vehivavy janga izay mandokadoka amin’ny teniny,

¹⁷izay mahafoy ny sakaizan’ny fahatanorany sy manadino ny fanekena nataony tamin’Andriamaniny;

¹⁸fa mirona ho amin’ny fahafatesana ny tranony, ary mankany amin’ny maty ny lalany.

¹⁹Tsy misy tafaverina izay mankany aminy sady tsy afaka mihazo ny lalan’ny fahavelomana.

²⁰Izany no handehananao amin’ny lalan’ny tsara fanahy sy hitandremanao ny alehan’ny marina.

²¹Fa ny olona mahitsy no honina amin’ny tany, ary ny tsy manan-tsiny ihany no ho sisa mitoetra ao.

²²Fa hofongorana amin’ny tany kosa ny ratsy fanahy, ary ny mpivadika dia hongotana.