Read La Bible en Malgache Ohabolana 20 Bible Online

Ohabolana 20 - La Bible en Malgache bible

Ohabolana 20

¹Mpaniratsira ny divay ary mpitabataba ny toaka; koa izay miraikiraiky azon’izany dia tsy hendry.

²Ny fandrahonana ataon’ny mpanjaka dia toy ny fieron’ny liona tanora; izay mampahatezitra azy dia miantso loza hihatra amin’ny tenany.

³Voninahitry ny olona ny manalavitra ny fifandirana, fa ny adala rehetra kosa misafoaka.

⁴Ny kamo dia tsy mety miasa tany amin’ny ririnina, saingy amin’ny fararano dia hangataka izy nefa tsy hahazo.

⁵Rano lalina ny hevitra ao am-pon’ny olona; izay manan-tsaina dia mahay manovo ao.

⁶Maro ny olona samy midera ny soa ataon’ny tenany avy, fa ny olona mahatoky, iza moa no mahita azy?

⁷Ny olona marina dia mandeha amin’ny fahitsiany; sambatra ny zanany mandimby azy.

⁸Mipetraka eo amin’ny seza fitsarana ny mpanjaka ka ny masony dia mikororòka manavaka ny ratsy rehetra.

⁹Iza no mahazo milaza hoe: Efa nahadio ny foko aho ka madio afaka tamin’ny otako?

¹⁰Ny vato mizana tsy mitovy sy ny famarana tsy sahala dia samy fahavetavetana eo imason’NY TOMPO.

¹¹Na dia ny tanora aza dia mampiseho amin’ny fanaony fa madio sy mahitsy ny asany.

¹²Ny sofina mandre sy ny maso mahita dia samy nataon’NY TOMPO avokoa.

¹³Aza tia torimaso ianao, fandrao ho tonga mahantra; ahirato ny masonao dia ho voky hanina ianao.

¹⁴Ratsy! Ratsy! Hoy ny mpividy; kanjo nony lasa izy dia miarahaba tena.

¹⁵Ao ihany ny volamena sy ny voahangy betsaka, fa ny molotra misy fahalalana no ravaka soa.

¹⁶Alao ny lambany fa efa niantoka olon-kafa izy ary ho solon’ny laniny tamin’ny fiantohana vahiny janga.

¹⁷Mamin’ny olona ny hanina azo tamin’ny fitaka, kanjo avy eo dia fasika no mameno ny vavany.

¹⁸Ny hevitra rehetra dia arafeto amin’ny fiaraha-misaina ary ny fahaiza-mandamina tsara no entonao miady.

¹⁹Izay mandehandeha manaratsy dia manambara ny tsiambaratelo, koa aza mifampiraharaha amin’izay mibedibedy foana.

²⁰Izay manozona ny rainy na ny reniny dia ho faty ao amin’ny haizim-pito ny jirony.

²¹Ny lova norombahina teo am-boalohany dia tsy hotahìna amin’ny ho avy.

²²Aza miteny hoe: Hamaly ny ratsy nataony aho, fa miandrasa NY TOMPO, fa Izy no hamonjy anao.

²³Fahavetavetana eo imason’NY TOMPO ny vatomizana tsy mitovy ary ny mizana mandainga dia tsy tsara.

²⁴NY TOMPO no mitantana ny dian’ny olona; fa ny olombelona, hataony ahoana ny hahafantatra ny lalany?

²⁵Fandrika amin’ny olona ny malaky miteny hoe: Zavatra masina ity, ka nony vita ny voady vao mieritreritra.

²⁶Ny mpanjaka hendry dia mikororòka manaisotra ny ratsy fanahy sady mandefa ny kodiarana eo amboniny.

²⁷Jiron’NY TOMPO ny fanahin’ny olona hitsilovana ny efitrefitra rehetra ao am-po.

²⁸Famindrampo sy fahamarinana no miaro ny mpanjaka ary ampitoeriny amin’ny famindrampo ny sezafiandrianany.

²⁹Voninahitry ny zatovo ny tanjany ary ravaky ny zokiolona ny volo fotsy.

³⁰Ny ratra avy amin’ny kapoka dia mahafaka ny haratsiam-panahy ary ny kapoka dia tonga hatrany amin’ny aty fo.