Read La Bible en Malgache Ohabolana 21 Bible Online

Ohabolana 21 - La Bible en Malgache bible

Ohabolana 21

¹Toy ny rano velona eo an-tanan’NY TOMPO ny fon’ny mpanjaka ka tarihiny ho amin’izay tiany.

²Ataon’ny olona ho marina avokoa ny lalana rehetra alehany, fa NY TOMPO ihany no mpandanja ny fo.

³Ny hanao izay marina sy mahitsy no sitraky NY TOMPO mihoatra noho ny fanatitra alatsa-dra.

⁴Ny fiandranandran’ny maso sy ny fiavonavon’ny fo, izay jiron’ny ratsy fanahy, dia ota.

⁵Ny hevitry ny mazoto dia mampanankarena, fa ny maimaika rehetra dia hahantra ihany.

⁶Ny fahazoana harena amin’ny lela mandainga dia fofonaina mihelina ho an’izay mitady fahafatesana.

⁷Ny herisetran’ny ratsy fanahy dia hamongotra azy satria mandà tsy hanao izay marina izy.

⁸Miolikolika ny lalan’ny mavesa-keloka, fa mahitsy ny asan’ny madio.

⁹Aleo mitoetra eo an-joron’ny tampon-trano toy izay hiray trano amin’ny vehivavy tia ady.

¹⁰Ny ratsy fanahy dia maniry ny ratsy ka na ny havany aza dia tsy mahita fitia eo imasony.

¹¹Raha sazina ny mpaniratsira dia ho hendry ny kely saina ary raha toroan-kevitra ny hendry dia hahazo fahalalana izy.

¹²Ny marina dia mandinika ny tranon’ny ratsy fanahy ka mamarina azy ho amin’ny loza.

¹³Izay manentsin-tadìny amin’ny fitarainan’ny mahantra dia mba hitaraina koa, nefa tsy hohenoina.

¹⁴Ny fanomezana mangingina dia mampionona ny fahatezerana ary ny kolikoly amin’ny takona dia mampitsahatra ny fahavinirana mafy.

¹⁵Fifalian’ny marina ny hanao araka ny rariny, fa zava-mahatahotra ny mpanao ratsy kosa izany.

¹⁶Ny olona izay mivily miala amin’ny lalan’ny fahendrena dia hitoetra ao amin’ny fivorian’ny fanahin’ny maty.

¹⁷Izay tia fanaranam-po dia ho olona sahirana; eny, tsy mba hanankarena izay tia divay sy diloilo.

¹⁸Ny ratsy fanahy dia ho avotry ny marina ary ny mpivadika no ho solon’ny mahitsy.

¹⁹Aleo mitoetra any an-tany efitra toy izay miaraka amin’ny vehivavy tia ady sady mora tezitra.

²⁰Harena mahafinaritra sy diloilo no ao amin’ny tranon’ny hendry, fa ny adala mandany ny azy.

²¹Izay mikatsaka ny fahamarinana sy ny famindrampo dia hahazo fiainana sy fahamarinana ary voninahitra.

²²Mananika ny vohitry ny mahery ny hendry ka mandrodana ny fiarovana mafy izay itokiany.

²³Izay miambina ny vavany sy ny lelany dia miaro ny tenany tsy ho azom-pahoriana.

²⁴Izay mirehareha sy miavonavona no antsoina hoe mpaniratsira, dia izay olona fatra-piavonavona.

²⁵Ny fanirian’ny kamo dia hahafaty azy satria tsy mety miasa tsinona ny tanany;

²⁶maniry fatratra izy mandritra ny andro; ny marina kosa manome fa tsy mba mahihitra.

²⁷Fahavetavetana ny fanatitry ny ratsy fanahy, indrindra raha amin’ny sain-dratsy no anolorany azy!

²⁸Ho levona ny vavolombelona mandainga, fa izay mahay mihaino dia ho afaka hiteny mandrakariva.

²⁹Mampiseho ny fahasahisahiany amin’ny tarehiny ny ratsy fanahy, fa ny marina kosa dia mihevitra tsara ny lalan-kalehany.

³⁰Tsy misy fahendrena na fahalalana na fisainana mahazaka ny fanatrehana NY TOMPO!

³¹Voaomana ho amin’ny andro iadiana ny soavaly, fa an’NY TOMPO ihany ny famonjena.