Read La Bible en Malgache Ohabolana 22 Bible Online

Ohabolana 22 - La Bible en Malgache bible

Ohabolana 22

¹Aleo tsara laza toy izay be harena; tsara ny fitia noho ny volafotsy sy ny volamena.

²Mihaona ny mpanankarena sy ny mahantra, fa NY TOMPO no mpanao azy roa tonta.

³Ny mahira-tsaina dia mahatsinjo ny loza ka miery, fa ny kely saina kosa mandroso ka voa.

⁴Ny valin’ny fanetren-tena sy ny fahatahorana NY TOMPO dia harena sy voninahitra ary fiainana.

⁵Tsilo sy fandrika no amin’ny lalan’ny maditra, fa izay te hiaro ny ainy dia manalavitra izany.

⁶Zaro amin’izay lalana tokony halehany ny zaza ka na rehefa antitra aza izy dia tsy hiala amin’izany.

⁷Ny mpanankarena dia mifehy ny mahantra ary izay misambotra dia mpanompon’ny mampisambotra.

⁸Izay mamafy heloka dia hijinja fahoriana ary ho levona ny tsorakazon’ny fahatezerany.

⁹Hotahìna izay manana maso miantra satria anomezany ho an’ny mahantra ny haniny.

¹⁰Roahy ny mpaniratsira dia ho afaka ny fifandirana; eny, hitsahatra ny ady sy ny fahafaham-baraka.

¹¹Izay tia fahadiovam-po dia milaza soa ny molony sady sakaizan’ny mpanjaka izy.

¹²Ny mason’NY TOMPO dia miaro ny fahalalana, fa ny tenin’ny mpivadika asafotofotony.

¹³Hoy ny kamo: Misy liona any ivelany any; ho faty ao an-dalambe ao aho!

¹⁴Ny tenin’ny vehivavy jejo dia lavaka lalina; izay tezeran’NY TOMPO no ho latsaka ao.

¹⁵Miraikitra amin’ny fon’ny zaza ny hadalana, fa ny tsorakazo famaizana no hampanalavitra izany aminy.

¹⁶Izay mampahory ny mahantra dia mampitombo harena azy, fa izay manome ho an’ny manana kosa dia mampihena ny hareny.

¹⁷Atongilano ny sofinao ka henoy ny tenin’ny hendry ary ampitandremo ny fahalalako ny fonao.

¹⁸Fa mahafinaritra raha voatahirinao ao anatinao izany, koa aoka samy ho vonona eo amin’ny molotrao izy rehetra.

¹⁹Ianao dia ianao no nampahafantariko izany mba hitokianao amin’NY TOMPO.

²⁰Tsy efa nanoratra toko telopolo ho anao va aho, ka misy hevitra tsara sy fahalalana ao

²¹mba hampahafantarako anao ny fahamarinan’ny teny mahatoky sy hahazoanao ny teny holazaina amin’izay naniraka anao?

²²Aza mandroba ny mahantra noho ny fahantrany ary aza dia manitsakitsaka ny ory eo amin’ny fitsarana.

²³Fa NY TOMPO anie ka hisolo vava azy amin’ny adiny ary hamongotra ny ain’izay mamongotra azy.

²⁴Aza misakaiza amin’ny olona mora tezitra ary aza miara-dia amin’ny olona saro-po,

²⁵fandrao hianatra ny fanaony ianao ka hahazo fandrika ho an’ny ainao.

²⁶Aza mety ho isan’ny mifandray tanana, na izay mianto-trosa;

²⁷raha tsy manan-kaloa ianao, nahoana no dia halainy ny lafika fandrianao?

²⁸Aza manakisaka ny fanamarihana ny zaratany efa teo hatry ny ela ary efa natsangan’ny razanao.

²⁹Mahita olona kinga amin’ny raharahany va ianao? Eo anatrehan’ny mpanjaka no hijoroany, fa tsy hijoro eo anatrehan’ny olona ambany toerana izy.