Read La Bible en Malgache Ohabolana 23 Bible Online

Ohabolana 23 - La Bible en Malgache bible

Ohabolana 23

¹Raha mipetraka hiara-komana amin’ny mpanapaka ianao dia hevero tsara izay eo anoloanao

²ka ambeno amin’ny antsy ny tendanao raha dia mazoto homana loatra ianao.

³Aza mitsiriritra ny hanim-piny fa hani-mamitaka izany.

⁴Aza manasa-tena hanankarena; aza entina amin’izany ny fahendrenao.

⁵Ampanarahanao ny harena va ny masonao nefa tsy eo intsony izy? Fa maniry elatra tokoa izy ka manidina toy ny voromahery ho eny amin’ny lanitra!

⁶Aza homana ny mofon’izay ratsy fijery ary aza mitsiriritra ny hanim-piny;

⁷fa tahaka ny heviny ao am-pony ihany ny toetrany. Hoy izy aminao: Mihinàna, misotroa; kanjo tsy sitrany akory ianao.

⁸Izay sombiny kely voatelinao aza dia mbola haloanao ka ho very foana ny teny mahafinaritra nataonao.

⁹Aza miteny ao an-tsofin’ny adala, fa hohamavoiny foana ny fahendren’ny teninao.

¹⁰Aza manakisaka ny fanamarihana zaratany efa teo hatry ny ela, ary aza miditra ao amin’ny sahan’ny kamboty,

¹¹fa mahery ny Mpanavotra azy, Izy no hisolo vava azy amin’ny adiny aminao.

¹²Atodiho hanaiky ny fananarana ny fonao ary amin’ny tenim-pahalalana ny sofinao.

¹³Aza matahotra mananatra ny zanaka, fa tsy ho faty izy tsy akory na dia kapohinao amin’ny hazo aza.

¹⁴Raha mamely azy amin’ny hazo ianao dia ho voavonjinao tsy ho any amin’ny fitoeran’ny maty* izy.

¹⁵Anaka, raha hendry ny fonao dia ho faly koa ny foko;

¹⁶eny, ho ravoravo ato anatiko tokoa aho raha milaza izay mahitsy ny molotrao.

¹⁷Aoka tsy hialona ny mpanota ny fonao, fa matahora NY TOMPO mandritra ny andro;

¹⁸fa mbola misy ny ho avy ka tsy ho foana ny fanantenanao.

¹⁹Mihainoa ianao, anaka, ka hendre ary ampizory amin’ny lala-mahitsy ny fonao.

²⁰Aza misakaiza amin’izay mpiboboka divay sy izay fatra-pitia hena;

²¹fa hahantra izay mpiboboka sy izay fatra-pitia hena, ary ny fitiavan-torimaso dia mampitafy vorodamba.

²²Maneke ny rainao izay niteraka anao ary aza manamavo ny reninao na dia efa antitra aza izy.

²³Vidio ny marina fa aza amidy, dia ny fahendrena sy ny fananarana ary ny fahazavan-tsaina.

²⁴Feno fifaliana ny rain’ny olo-marina ary izay miteraka zaza hendry dia manam-pifaliana aminy!

²⁵Aoka ho faly ny rainao sy ny reninao; eny, aoka ho ravoravo ny reninao izay niteraka anao!

²⁶Anaka, atolory ahy ny fonao, ary aoka ny masonao hifaly amin’ny lalako.

²⁷Fa ny vehivavy janga dia hady lalina ary ny vehivavy jejo dia lava-drano ety;

²⁸eny, manao vela-pandrika toy ny jiolahy ireny ary mahamaro ny olona mpivadika.

²⁹An’iza ny Indrisy? An’iza ny Loza? An’iza ny fifandirana? An’iza ny fitolokoana? An’iza ny ratra tsy amin’antony? An’iza ny maso mivoaramena?

³⁰An’izay mandany andro eo amin’ny divay, eny, an’izay mandeha hanandrana divay voaharoharo zavatra.

³¹Aza mijery ny divay noho ny hamenany, sy ny fanganohanony ao anaty vera, ary ny fikoriany mahafinaritra;

³²fa any aoriana any dia hanaikitra toy ny bibilava izy ary hanindrona toy ny menarana.

³³Koa ny masonao dia hijery vehivavy jejo ary ny fonao hirediredy foana.

³⁴Eny, ho sahala amin’izay mandry ao anaty ranomasina ianao sady ho tahaka izay mandry eo an-tendron’ny andrin-tsambo.

³⁵Voakapoka aho, hoy ianao, nefa tsy reko naharary ahy! Voadaroka aho, nefa tsy tsaroako izany! Rahoviana ange aho no hifoha mba hitadiavako divay indray?