Read La Bible en Malgache Ohabolana 24 Bible Online

Ohabolana 24 - La Bible en Malgache bible

Ohabolana 24

¹Aza mialona ny olona ratsy fanahy, na maniry ho namany,

²fa fandravana no saintsainin’ny fony, ary fampahoriana no tenenin’ny molony.

³Fahendrena no anaovana trano, ary halalinan-tsaina no mampaharitra azy.

⁴Fahalalana no hamenoana ny efitrano amin’izay harena soa sy mahafinaritra rehetra.

⁵Feno hery ny lehilahy hendry; eny, mitombo hery ny olona manam-pahalalana.

⁶Fa ny fahaizana mandinika tsara no entonao miady; ary raha maro ny mpanolotsaina dia misy famonjena.

⁷Avo tsy takatry ny adala ny fahendrena; tsy mahaloa-bava eo amin’ny vavahady* izy.

⁸Izay misaintsaina hanao ratsy dia antsoina hoe mpamoron-tsain-dratsy.

⁹Ota ny fikasan’ny hadalana ary fahavetavetana eo imason’ny olona ny mpaniratsira.

¹⁰Raha azom-paharerahana ianao amin’ny andro fahoriana dia kely izany ny herinao.

¹¹Afaho izay entina hovonoina, ary vonjeo izay mangozohozo efa eo am-pamonoana!

¹²Raha hoy ianao: Tsia, tsy mahalala izany izahay! Moa Izay mandanja ny fo va tsy hihevitra izany? Ary Izay mandinika ny fanahinao va tsy hahalala izany? Eny, hovaliany araka ny asany avy ny olona rehetra.

¹³Anaka, homàna tantely fa tsara izany! Homàna koa toho-tantely fa ho mamy amin’ny lanilaninao izany.

¹⁴Ary aoka ho toy izany no hianaranao fahendrena ho anao; fa raha azonao izany dia tsara antoka ny ho avy ka tsy ho foana ny fanantenanao.

¹⁵Aza manao vela-pandrika eo akaikin’ny tranon’ny marina ianao, ry ilay ratsy; aza ravanao ny fonenany;

¹⁶fa potraka impito ny marina, nefa tafarina ihany, fa ny ratsy fanahy kosa dia solafaka raha azom-pahoriana.

¹⁷Aza faly raha lavo ny fahavalonao, ary aza ravoravo ny fonao raha tafintohina izy;

¹⁸fandrao hitan’NY TOMPO izany ka ho ratsy eo anatrehany, ary esoriny aminy ny fahatezerany.

¹⁹Aoka tsy hirehitra noho ny amin’ny mpanao ratsy ny fahatezeranao, ary aza mialona ny ratsy fanahy;

²⁰Fa tsy hisy fanantenana ho an’ny ratsy; eny, ho faty ny jiron’ny ratsy fanahy.

²¹Anaka, matahora NY TOMPO sy ny mpanjaka ary aza mikambana amin’izay mpanovaova zavatra.

²²Fa ho tampoka no hitrangan’izay hanjo ireny; ary iza no mahalala izay loza hanjo azy roa tonta?

²³Izao koa no tenin’ny hendry: Tsy mety ny mizaha tavan’olona amin’ny fitsarana.

²⁴Izay milaza amin’ny meloka hoe: Marina ianao, dia hozonin’ny olona sady ho halan’ny firenena;

²⁵fa izay mitsara marina kosa no hahita soa sy hahazo fitahiana tsara.

²⁶Izay manome valinteny tsara dia manoroka ny molotra.

²⁷Amboary ny asanao any ivelany ary ataovy lavorary ny any an-tsaha, koa rehefa vita izany dia mahazo manangana ny tranonao ianao.

²⁸Aza manao fiampangana tsy marim-pototra amin’ny namanao; moa hamitaka amin’ny molotrao va ianao?

²⁹Aza miteny hoe: Araka izay nataony tamiko no mba hataoko aminy kosa, hovaliako araka izay nataony ny olona.

³⁰Nandalo ny sahan’ny kamo sy ny tanim-boaloboky ny tsy ampy saina aho;

³¹koa indro, feno songosongo izy sady voasaron’ny tsilo, ary nirodana ny fefy vatony.

³²Dia nojereko ka noheveriko tsara; eny, hitako ka nahazoako anatra.

³³Mbola hatory kely ihany, mbola ho renoka kely ihany, mbola hanohon-tanana kely hatory;

³⁴dia ho tonga toy ny mpirenireny hamely ny fahantranao ary ny fahasahirananao ho toy ny jiolahy mirongo fiadiana.