Read La Bible en Malgache Ohabolana 25 Bible Online

Ohabolana 25 - La Bible en Malgache bible

Ohabolana 25

¹Ireto koa ny ohabolan’i Solomona, izay nangonin’ny olon’i Hezekia, mpanjakan’ny Joda:

²Voninahitr’Andriamanitra ny manafin-javatra, fa voninahitry ny mpanjaka kosa ny mamanta-javatra.

³Ny haavon’ny lanitra sy ny halalin’ny tany ary ny fon’ny mpanjaka dia samy tsy azo fantarina avokoa.

⁴Esory ny taim-bolafotsy dia hisy fanaka ho an’ny mpandrendrika.

⁵Esory ny ratsy fanahy tsy ho eo anatrehan’ny mpanjaka dia ho tafaorina amin’ny fahamarinana ny sezafiandrianany.

⁶Aza manandra-tena eo anatrehan’ny mpanjaka ary aza mijoro eo amin’ny toeran’ny lehibe;

⁷fa aleo ianao hantsoina hoe: Miakara etỳ! Toy izay atambotsotra eo imason’ny manankaja izay hitan’ny masonao.

⁸Aza maika hampiditra ady amin’ny fitsarana, satria, inona no hataonao amin’ny manaraka raha resin’ny mpiady aminao ianao?

⁹Miadia ihany ny adinao amin’ny namanao, kanefa aza aseho izay tsy tian’ny sasany holazaina,

¹⁰fandrao izay mandre dia hanondro maso anao ka tsy ho afaka aminao ny laza ratsy.

¹¹Ny teny atao amin’ny antony dia paoma volamena misy ravaka volafotsy.

¹²Kavina volamena sy ravaka volamena tsara ny mpananatra hendry, raha amin’ny sofina mihaino.

¹³Toy ny hatsiakan’ny orampanala amin’ny taom-pijinjana, dia toy izany ny iraka mahatoky amin’izay naniraka azy: Mamelombelona ny fon’ny tompony izy.

¹⁴Toy ny rahona sy ny rivotra tsy misy orana ny olona izay mirehaka mampanantena fanomezana tsy misy akory.

¹⁵Ny fahari-po no ahazoana mampanaiky ny mpitondra, ary ny teny malefaka no mahatapaka taolana.

¹⁶Mahita tantely va ianao? Hano izay antonona anao, fandrao voky loatra ianao ka handoa azy.

¹⁷Aza miditra matetika ao an-tranon’ny namanao, fandrao tofoka aminao izy ka ho halany ianao.

¹⁸Langilangy sy sabatra ary zana-tsipìka maranitra ny olona izay mitsangana ho vavolombelona mandainga hanameloka ny namany.

¹⁹Toy ny nify simatsimaka sy ny tongotra mangozohozo ny fiankinana amin’ny mpamitaka amin’ny andro fahoriana.

²⁰Toy ny miala lamba amin’ny hatsiaka ary toy ny vinaingitra amin’ny sirahazo, dia toy izany ny mikalo amin’ny malahelo am-po.

²¹Raha noana ny fahavalonao, omeo hanina izy; ary raha mangetaheta izy, omeo rano hosotroiny.

²²Fa amin’izany dia hanambatra vainafo ho eo ambonin’ny lohany ianao ary NY TOMPO no hamaly soa anao.

²³Ny rivotra avy any avaratra no mahatonga ranonorana, dia toy izany ny lelan’ny mpifosa, mahavinitra endrika.

²⁴Aleo mitoetra eo an-joron’ny tampon-trano* toy izay miray trano amin’ny vehivavy tia ady.

²⁵Rano mangatsiatsiaka amin’ny fanahy reraka ny filazana soa avy any an-tany lavitra.

²⁶Loharano voahosihosy sy fantsakana voaloto ny marina izay mihozongozona eo anatrehan’ny ratsy fanahy.

²⁷Tsy tsara ny mihinan-tantely be loatra na ny mitady voninahitra hanampy voninahitra.

²⁸Tanàna rava tsy misy manda ny lehilahy izay tsy mahatsindry ny fahatezerany.