Read La Bible en Malgache Ohabolana 26 Bible Online

Ohabolana 26 - La Bible en Malgache bible

Ohabolana 26

¹Toy ny orampanala amin’ny lohataona ary toy ny ranonorana amin’ny taom-pijinjana, dia toy izany ny voninahitra, tsy antonona ho an’ny adala.

²Toy ny voronkely mivezivezy sy ny sidintsidina manidina, dia toy izany ny fanozonana tsy amin’antony: Tsy mba hihatra izany.

³Ny karavasy dia ho an’ny soavaly, ny lamboridy ho an’ny boriky ary ny tsorakazo dia ho an’ny lamosin’ny adala.

⁴Aza mamaly ny adala araka ny hadalany, fandrao mba adala tahaka azy koa ianao.

⁵Valio araka ny hadalany ny adala, fandrao hihevi-tena ho hendry izy.

⁶Manapaka ny tongony sady misotro loza izay mampitondra teny ny adala.

⁷Bilabila ny ranjon’ny malemy tongotra, dia toy izany ny ohabolana eo am-bavan’ny adala.

⁸Toy ny manisy vato amin’ny antsamotady, dia toy izany ny manome voninahitra ny adala.

⁹Toy ny tsilo eny an-tanan’ny olona mamo, dia toy izany ny ohabolana eo am-bavan’ny adala.

¹⁰Ny mpandefa zana-tsipìka dia mahavoa ny olona rehetra, toy izany ny manakarama ny olona adala, na ny manakarama izay sendra mandalo.

¹¹Toy ny amboa miverina amin’ny loany, dia toy izany ny adala miverina amin’ny hadalany.

¹²Hitanao va ny olona mihevi-tena ho hendry? Misy hantenaina kokoa ny adala noho izy.

¹³Hoy ny kamo: Misy liona any an-dalana! Misy liona atsy an-dalambe!

¹⁴Toy ny varavarana mihodina amin’ny saviliny, dia toy izany ny kamo eo amin’ny fandrianany.

¹⁵Mangarona ny eo an-doviany ny kamo, nefa ny hampakatra azy ho amin’ny vavany dia mahasasatra azy.

¹⁶Ny kamo dia mihevi-tena ho hendry mihoatra noho ny olona fito izay mahavaly tsara.

¹⁷Ny mpandalo izay mitsabaka amin’ny ady izay tsy azy dia mandroritra amboa amin’ny sofiny.

¹⁸Toy ny olona mihetsika hadalana izay manely afo sy zana-tsipìka ary fahafatesana,

¹⁹toy izany ny olona mamitaka ny namany ka miteny hoe: Tsy kivazivazy ihany va no nataoko?

²⁰Rehefa tsy misy kitay intsony dia maty ny afo, ary rehefa tsy misy mpifosafosa intsony dia mangina ny fifandirana.

²¹Toy ny arina atao amin’ny vainafo sy ny kitay hazo atao amin’ny afo, dia toy izany ny olona tia ady, mandrehitra fifandirana.

²²Ny tenin’ny mpifosafosa dia toy ny hanim-py ka mikorotsaka hatrany anaty rehetra any.

²³Tavim-bilany nopetahana taim-bolafotsy ny molotra mirehitra fiteny sy ny fo ratsy.

²⁴Ny mpandrafy dia mody hafa eo amin’ny molony sady manafim-pitaka ao am-pony.

²⁵Koa na dia miteny soa aza izy, aza mino azy fa fahavetavetana fito no ao am-pony.

²⁶Ny fankahalana dia mety hiafina ao anatin’ny fitaka, nefa ny haratsiam-panahiny dia hiharihary eo ampahibemaso.

²⁷Izay mihady lavaka no ho latsaka ao ary izay manakodiadia vato kosa no hikodiavany.

²⁸Halan’ny lela mandainga ny olona izay nampahoriny ary ny vava mandokadoka foana dia mahatonga faharavana.