Read La Bible en Malgache Ohabolana 27 Bible Online

Ohabolana 27 - La Bible en Malgache bible

Ohabolana 27

¹Aza mirehareha ny amin’ny ho ampitso ianao, fa na dia ny havoakan’ny anio aza dia tsy fantatrao.

²Aoka ny olon-kafa no hidera anao, fa tsy ny tenanao; eny, ny vahiny, fa tsy ny molotrao.

³Mavesatra ny vato ary misy lanjany ny fasika, fa ny fahasosoran’ny adala dia manoatra noho izy roa tonta.

⁴Masiaka ny fahavinirana ary misafoaka ny fahatezerana; fa iza no mahajanona eo anatrehan’ny fahasaro-piaro?

⁵Aleo anatra imaso toy izay fitia afenina.

⁶Azo itokiana hahasoa ny fery ataon’ny sakaiza, fa tena fitaka ny fanorohana betsaka ataon’ny fahavalo.

⁷Hitsakitsahin’ny voky na dia ny toho-tantely aza, nefa mamin’ny noana na dia ny zava-mangidy rehetra aza.

⁸Toy ny voronkely miala amin’ny akaniny ka mirenireny, dia toy izany ny olona izay mirenireny miala amin’ny fonenany.

⁹Ny diloilo sy ny zavamanitra dia mahafaly ny fo; aleo ny hamamin’ny fisakaizana toy izay ny hevitra avy amin’ny tena.

¹⁰Aza mahafoy ny sakaizanao, na ny sakaizan-drainao, ary aza mankany amin’ny tranon’ny rahalahinao amin’ny andro fahorianao. Tsara ny namana akaiky noho ny rahalahy lavitra.

¹¹Anaka, hendre, ary ampifalio ny foko mba hamaliako izay miteny ratsy ahy.

¹²Mahatazana ny loza ny mahira-tsaina ka miery, fa mandroso kosa ny kely saina ka voa.

¹³Alao ny lambany fa efa niantoka olon-kafa izy, ary ho solon’ny laniny tamin’ny niantohany vahiny janga.

¹⁴Izay mifoha maraina ka miarahaba ny sakaizany amin’ny feo mahery dia isaina ho fanozonana ny fiarahabany.

¹⁵Tahaka ny ranonorana mijononoka ny vavan’ny vehivavy tia ady.

¹⁶Izay misakana azy dia toy ny misakana ny rivotra sady toy ny mamihina diloilo amin’ny tanany havanana.

¹⁷Ny vy no andranitana ny vy; toy izany, ny fanatrehan’ny sakaiza no mampahiratra ny endriky ny sakaizany.

¹⁸Izay miambina ny hazo aviavy dia hihinana ny voany ary izay miambina ny tompony dia homem-boninahitra.

¹⁹Toy ny tandindona ao anaty rano ka mifanahaka amin’ny tarehy, dia toy izany no ifanahafan’ny fon’ny olona amin’ny olona.

²⁰Ny fitoeran’ny maty* sy ny tanin’ny fandringanana dia tsy mety voky; toy izany ny mason’ny olona: Tsy mety afa-po izy.

²¹Ny memy no ahafantarana ny tena volafotsy, ny fandrendrehana no ahafantarana ny tena volamena, ary ny toetry ny olona dia tsy maintsy ho araka ny lazany.

²²Na dia miara-totoinao fanoto amin’ny vary ao an-daona aza ny adala dia tsy mba hiala aminy tsy akory ny fahadalany.

²³Fantaro tsara ny ondry aman’osinao, ary miahia tsara ny andian’ny bibinao,

²⁴fa ny harena tsy ho mandrakizay; ary moa haharitra ho amin’ny taranaka rehetra va ny satroboninahitra?

²⁵Na dia lany aza ny ahitra ka mitsiry ny solofony ary voataona ny zavamaniry any an-tendrombohitra,

²⁶ny zanak’ondry no hahazoanao fitafiana ary ny osy dia hamidinao tany;

²⁷ampy hosotroinao sy ho an’ny ankohonanao ny rononon’osy ary hisy hiveloman’ny mpanompovavinao.