Read La Bible en Malgache Ohabolana 28 Bible Online

Ohabolana 28 - La Bible en Malgache bible

Ohabolana 28

¹Mandositra ny ratsy fanahy na dia tsy misy manenjika aza; fa ny marina kosa dia matoky toy ny liona tanora.

²Ny fikomian’ny tany dia mahamaro isa ny mpanapaka eo aminy; fa ny fisian’ny olona manan-tsaina sy fahalalana kosa no mampateza ny fanjakana.

³Ny lehilahy mahantra izay mampahory ny madinika dia toy ny ranonorana izay mipaoka ka tsy mamela hanina.

⁴Izay mahafoy ny lalàna dia mandoka ny ratsy fanahy, fa izay mitandrina ny lalàna kosa dia mirehitra hanohitra azy.

⁵Tsy mahalala izay rariny ny ratsy fanahy, fa izay mitady NY TOMPO no mahalala ny zavatra rehetra.

⁶Ny mahantra izay mandeha amin’ny fahitsiany dia tsara noho ny manankarena nefa mandeha amin’ny lalana miolikolika.

⁷Izay mitandrina ny lalàna no zanaka hendry, fa izay misakaiza amin’ny mpandany harena dia manome henatra ny rainy.

⁸Izay mampitombo ny fananany amin’ny zana-bola sy ny tombony dia manangona ho an’izay miantra ny mahantra.

⁹Izay manentsin-tadìny dia tsy hihaino ny fampianarana; na ny vavaka ataony aza dia fahavetavetana.

¹⁰Izay mampivily ny mahitsy ho amin’ny lalan-dratsy dia ho lavo ao amin’ny lavaka nataony; fa ny tsy misy tsiny no handova ny soa.

¹¹Mihevi-tena ho hendry ny mpanankarena, fa ny mahantra izay manan-tsaina dia hizaha toetra azy.

¹²Rehefa ravoravo ny marina dia lehibe ny voninahitra; fa rehefa misandratra kosa ny ratsy fanahy dia miery ny vahoaka.

¹³Izay manafina ny fahotany dia tsy hambinina, fa izay mitsotra ka mahafoy azy no hahazo famindrampo.

¹⁴Sambatra izay olona matahotra mandrakariva! Fa izay manamafy ny fony no hidiran-doza.

¹⁵Liona mierona sy bera miremby amin’ny olona reraka ny mpanapaka ratsy fanahy.

¹⁶Ny mpanapaka tsy ampy saina dia mahery mampahory, fa izay mankahala ny fitiavan-karena no ho ela velona.

¹⁷Izay itambesaran-keloka noho ny fandatsahan-dra dia handositra hatrany an-davaka; aoka tsy hisy hihazona azy!

¹⁸Izay mandeha tsy misy tsiny no ho voavonjy, fa izay mandia lalana roa miolikolika dia hianjera ao amin’ny iray.

¹⁹Izay miasa ny taniny dia ho voky hanina, fa izay manenjika zava-poana ho voky fahantrana kosa.

²⁰Izay olona mahatoky dia hahazo fitahiana be, fa izay maimay ta hanankarena tsy ho afa-tsiny.

²¹Tsy mety ny mizaha tavan’olona; fa na dia amin’ny sombin-kanina ihany aza dia sahin’ny olona hanotana.

²²Ny mpialona dia maimay ta hanankarena; tsy fantany fa ho tonga aminy ny tsy fisiana.

²³Izay mananatra olona no hahita fitia rahatrizay mihoatra noho izay mandokadoka amin’ny lelany.

²⁴Izay mandroba ray sy reny ka milaza hoe: Tsy heloka izany, dia mpiray dia amin’ny jiolahy.

²⁵Izay tsy mety afa-po dia manetsika ady, fa izay matoky NY TOMPO no hanana ny feno.

²⁶Izay matoky ny fony dia adala, fa izay mandeha amin’ny fahendrena no ho afa-miala.

²⁷Izay manome ny mahantra dia tsy hisy zava-mahory azy, fa izay minia mikimpy kosa dia hahazo ozona be.

²⁸Raha misandratra ny ratsy fanahy dia miery ny vahoaka; fa raha ringana kosa izy dia mihamaro ny marina.