Read La Bible en Malgache Ohabolana 29 Bible Online

Ohabolana 29 - La Bible en Malgache bible

Ohabolana 29

¹Izay olona anarina matetika ka mihamafy hatoka dia ho torotoro tampoka ka tsy hisy fanafana.

²Raha mihamaro ny marina dia faly ny vahoaka; fa raha ny ratsy fanahy no mitondra dia misento kosa izy.

³Izay tia fahendrena no mahafaly ny rainy, fa izay misakaiza amin’ny vehivavy janga dia mandany harena.

⁴Ny rariny no ampandrian’ny mpanjaka ny tany, fa izay fatra-pampandoa hetra no mandrava azy kosa.

⁵Izay olona mandokadoka foana ny namany dia manao vela-pandrika ho an’ny tongony.

⁶Misy fandrika amin’ny heloky ny olon-dratsy, fa ny marina dia mihoby sy mifaly.

⁷Ny marina dia mihevitra ny adin’ny mahantra, fa ny ratsy fanahy tsy mahalala izany ho fahendrena.

⁸Mampihotakotaka ny tanàna ny mpaniratsira, fa ny hendry dia mampitony kosa ny fahatezerana.

⁹Raha ny hendry no miady amin’ny adala eo amin’ny fitsarana, na ho tezitra izy na hihomehy dia tsy hanam-pitsaharana.

¹⁰Ny olona mpandatsa-dra dia mankahala ny tsy misy tsiny, fa miahy ny ainy kosa ny mahitsy.

¹¹Ny hatezeran’ny adala dia avoakany avokoa, fa manindry fo kosa ny hendry.

¹²Raha mihaino lainga ny mpanapaka dia ho ratsy fanahy ny mpanompony rehetra.

¹³Mihaona ny mahantra sy ny mpampahory; NY TOMPO no manazava ny mason’izy roa tonta.

¹⁴Izay mpanjaka mitsara marina ny mahantra dia haharitra mandrakizay ny sezafiandrianany.

¹⁵Ny tsorakazo sy ny anatra no manome fahendrena, fa ny zaza avela hanao izay tiany hatao dia mampahamenatra ny reniny.

¹⁶Raha maro ny ratsy fanahy dia mitombo ny ota, fa ny marina ho faly mahita ny fahalavoany.

¹⁷Anaro ny zanakao dia ho famelombelomana ny fonao izy, sady ho fifalian’ny fanahinao.

¹⁸Raha tsy misy fahitana dia atondraka hanaram-po amin’izay tsy mety ny olona; fa raha mitandrina ny lalàna kosa izy dia sambatra!

¹⁹Raha teny fotsiny ihany, tsy ampy hananarana ny mpanompo, fa na dia azony aza, tsy ankatoaviny.

²⁰Hitanao va ny olona faingam-bava? Ny adala aza misy antenaina kokoa noho izy.

²¹Ny mpanompo izay nampihantaina hatry ny fahakeliny dia ho mpamingavinga any aoriana any.

²²Ny olona mora tezitra dia manetsika ady ary ny olona masiaka dia be fahadisoana.

²³Ny fiavonavonan’ny olona no hampietry azy, fa hahazo voninahitra kosa ny manetry tena.

²⁴Izay miray tetika amin’ny mpangalatra dia mankahala ny tenany; mandre ny fampianianana izy, nefa tsy mety milaza.

²⁵Mamandrika ny tahotra olona, fa izay matoky NY TOMPO no tsy hanana ahiahy.

²⁶Maro no mila sitraka amin’ny mpanapaka, fa avy amin’NY TOMPO ny rariny ho an’ny tsirairay.

²⁷Ny meloka dia fahavetavetana eo imason’ny marina; fa ny mahitsy lalana dia mba fahavetavetana kosa eo imason’ny ratsy fanahy.