Read La Bible en Malgache Ohabolana 3 Bible Online

Ohabolana 3 - La Bible en Malgache bible

Ohabolana 3

¹Anaka, aza manadino ny fampianarako, fa aoka ny fonao hitandrina ny didiko;

²fa hampitomboiny ho anao ny andro maro sy ny taona ela iainana ary ny fiadanana.

³Aoka tsy handao anao ny famindrampo sy ny fahamarinana; aoka iambozonanao izany, ary soraty ao am-ponao tahaka ny amin’ny vato fisaka,

⁴dia hahita fitia sy fahalalana tsara eo anatrehan’Andriamanitra sy ny olona ianao.

⁵Matokia NY TOMPO amin’ny fonao manontolo; aza miantehitra amin’ny fahalalanao;

⁶mahaiza mamantatra Azy amin’ny alehanao rehetra, fa Izy no handamina ny lalanao.

⁷Aza mihevi-tena ho hendry; matahora NY TOMPO ka mifadia ny ratsy

⁸dia ho famelombelomana ny nofonao izany sy ho fampangatsiatsiahana ny taolanao.

⁹Mankalazà NY TOMPO amin’ny fanananao sy amin’izay voaloham-bokatrao rehetra,

¹⁰dia ho feno mitafotafo ny fitoeram-barinao, ary hihoatra ny vata fanantazanao ny ranom-boaloboka.

¹¹Anaka, aza manamavo ny fitaizan’NY TOMPO, ary aza tofoka amin’ny fanitsiana ataony;

¹²fa izay tian’NY TOMPO no anariny, dia tahaka ny ataon’ny ray amin’ny zanaka tiany.

¹³Sambatra izay olona mahita fahendrena sy izay olona mahazo fahalalana!

¹⁴Aleo mikatsaka tombony avy aminy, toy izay mikatsaka tombony avy amin’ny volafotsy, ary ny tombom-barotra avy aminy dia mihoatra noho ny volamena;

¹⁵sarobidy noho ny voahangy izy, ary izay rehetra irinao dia tsy misy azo ampitahaina aminy.

¹⁶Fa andro maro no eo amin’ny tanany havanana, ary harena sy voninahitra no eo amin’ny tanany havia.

¹⁷Lalana mahafinaritra ny lalany ary fiadanana ny alehany rehetra.

¹⁸Hazon’aina ho an’izay rehetra mifikitra aminy izy ary izay rehetra mihazona azy no atao hoe sambatra.

¹⁹Tamin’ny fahendrena no nanorenan’NY TOMPO ny tany ary tamin’ny fahalalana no nampitoerany ny lanitra.

²⁰Ny fahalalany no noentiny nampiboiboika ny rano any amin’ny lalina sy ampitetevany ando avy amin’ny rahona.

²¹Anaka, aoka tsy hiala amin’ny masonao izany; raketo ny tena fahendrena sy ny fahaiza-mandinika,

²²dia ho aina ho an’ny fanahinao izany ary ho firavaky ny vozonao.

²³Dia hizotra amin’ny lalanao amin-toky ianao ka tsy ho tafintohina ny tongotrao.

²⁴Tsy hatahotra ianao raha mandry; eny, handry ianao, ary ho mamy ny torimasonao.

²⁵Aza manahy ny fampitahorana avy tampoka, na ny loza mandringana afitsoky ny ratsy fanahy raha avy izany;

²⁶fa NY TOMPO no ho tokinao ka hiambina ny tongotrao tsy ho voafandrika.

²⁷Aza mamihina ny soa amin’izay tokony homena azy raha azon’ny tananao atao ihany.

²⁸Aza miteny amin’ny namanao hoe: Mandehana ka miverena, fa rahampitso no homeko! Kanefa manana ihany ianao.

²⁹Aza mamorona sain-dratsy hoenti-mamely ny namanao raha mitoetra tsy manana ahiahy ao aminao izy.

³⁰Aza miady amin’olona tsy amin’antony raha tsy nanisy ratsy anao izy.

³¹Aza mialona ny mpanao herisetra na mifidy izay lalany akory.

³²Satria fahavetavetana eo imason’NY TOMPO ny mpivadika, fa ireo marina kosa no ataony sakaiza;

³³ao an-tranon’ny ratsy fanahy ny ozon’NY TOMPO, fa tahiny kosa ny fonenan’ny marina;

³⁴tsiratsirainy ny mpaniratsira, fa omeny fahasoavana kosa ny mpandefitra;

³⁵handova voninahitra ny hendry, fa henatra kosa no ho anjaran’ny adala,