Read La Bible en Malgache Ohabolana 30 Bible Online

Ohabolana 30 - La Bible en Malgache bible

Ohabolana 30

¹Ny teny mavesa-danja nataon’i Agora, zanak’i Jake, dia ny teny nataon-dRalehilahy tamin’Itiela, eny, tamin’Itiela sy Okala.

²Izaho dia biby fa tsy olona ary tsy manan-tsain’olombelona.

³Tsy nianatra fahendrena aho, na nahazo ny fahalalan’ny Iray Masina.

⁴Iza no efa niakatra tany an-danitra sady nidina indray? Iza no nahangona ny rivotra tao an-tanany? Iza no nahafono ny rano tamin’ny lambany? Iza no nametraka ireo faran’ny tany rehetra? Iza no anarany, ary iza no anaran’ny zanany? Fa toa fantatrao!

⁵Ny tenin’Andriamanitra dia voazaha toetra avokoa. Ampinga ho an’izay mialoka aminy Izy.

⁶Aza manampy ny teniny fandrao hanariny ianao ka ho hita fa mpandainga.

⁷Zavatra roa loha no angatahiko aminao ka aza lavinao, dieny tsy mbola maty aho:

⁸Ampanalaviro ahy ny zava-poana sy ny lainga; aza manome ahy fahantrana na harena; fahano aho amin’izay anjara hanina sahaza ho ahy,

⁹fandrao raha voky aho dia handa ka hiteny hoe: Iza moa NY TOMPO? Ary andrao raha tonga mahantra aho dia hangalatra ka hanamavo ny anaran’Andriamanitro.

¹⁰Aza manendrikendrika ny mpanompo amin’ny tompony fandrao hozoniny ianao ka hahazo heloka.

¹¹Misy taranaka izay manozona ny rainy sady tsy misaotra ny reniny.

¹²Misy taranaka milaza ny tenany ho madio, kanjo tsy voasasa ho afaka amin’ny fahalotoany akory.

¹³Misy taranaka izay mampianjonanjona ny fijeriny ary fatra-pampiridiridy ny hodimasony!

¹⁴Misy taranaka izay toy ny sabatra ny nifiny ary toy ny antsy ny vazany, hamongorany ny ory tsy ho amin’ny tany sy mba hanafoanany ny mahantra tsy ho amin’ny olona.

¹⁵Ny dinta manan-janakavavy roa, dia ny hoe: Omeo! Omeo! Misy zavatra telo tsy mety voky, eny, efatra aza no tsy milaza hoe: Aoka izay!

¹⁶Ny fitoeran’ny maty* sy ny kibo momba, ny tany izay tsy vonton-drano, ary ny afo koa no tsy mba milaza hoe: Aoka izay!

¹⁷Ny mianjonanjona amin-dray sady manazimba tsy mankatò reny dia hotsaingotsaingohin’ny goaika eny an-dohasahan-driaka ary hohanin’ny zana-boromahery.

¹⁸Misy zavatra telo mahagaga ka tsy takatro, eny, efatra aza no tsy fantatro:

¹⁹Ny lalan’ny voromahery eny amin’ny habakabaka, ny dian’ny bibilava eny amin’ny vatolampy, ny dian’ny sambo eny amin’ny ranomasina, ary ny dian’ny lehilahy mankany amin’ny tovovavy.

²⁰Tahaka izany koa ny fanaon’ny vehivavy mpijangajanga: Homana izy dia mamafa ny vavany ka miteny hoe: Tsy nanao izay ratsy aho!

²¹Izao fitondrana telo izao no tsy mampandry ny tany, eny, zavatra efatra aza no tsy zakany:

²²Raha ny andevo no tonga mpanjaka, raha ny adala no voky hanina,

²³raha ny vehivavy tsy tiana no ampakarina, ary raha ny mpanompovavy no mandova ny tompovaviny.

²⁴Izao zavatra efatra izao dia kely amin’ny etỳ ambonin’ny tany, nefa hendry sady mahay:

²⁵Ny vitsika izay firenena tsy matanjaka, nefa manangona ny haniny amin’ny fahavaratra;

²⁶ny hiràka izay firenena tsy manan-kery, nefa manao ny tranony eny amin’ny harambato;

²⁷ny valala izay tsy manana mpanjaka, nefa izy rehetra miainga manao antokony tsara;

²⁸ny antsiantsy izay azonao samborina amin’ny tanana, nefa tonga ao an-dapan’ny mpanjaka.

²⁹Misy zavatra telo izay tsara famindra, eny, efatra aza no tsara fandeha:

³⁰Ny liona, izay mahery indrindra amin’ny biby ka tsy mihemotra na amin’inona na amin’inona;

³¹ny soavaly voaomana hiady sy ny osilahy ary ny mpanjaka miaraka amin’ny miaramilany.

³²Raha adala ianao ka nanandra-tena, nefa mba nieritreritra, dia tampeno amin’ny tananao ny vavanao.

³³Ny fanotsankotsanana ny ronono no miteraka rononomandry; ny fanolanana ny orona no miteraka ra ary ny fanetsiketsehana ny fahatezerana no miteraka ady.