Read La Bible en Malgache Ohabolana 31 Bible Online

Ohabolana 31 - La Bible en Malgache bible

Ohabolana 31

¹Ny tenin’i Lemoela mpanjaka. Teny mavesa-danja izay nampianarin’ny reniny azy.

²Ahoana, anaka? Ary ahoana, ry zanako naterako? Ary ahoana, ry zanaky ny voadiko?

³Aza omena ny vehivavy ny herinao, ary aza mandeha amin’ny lalana izay mahavery mpanjaka.

⁴Tsy mety amin’ny mpanjaka, ry Lemoela, eny, tsy mety amin’ny mpanjaka ny misotro divay, na amin’ny mpanapaka ny ho fatra-paniry toaka,

⁵fandrao raha misotro izy dia hanadino ny lalàna ka mamily ny fitsarana ny olona ory.

⁶Omeo toaka izay efa ho faty, eny, divay ho an’izay azon’ny fangidiam-panahy;

⁷aoka hisotro izy mba hanadinoany ny fahantrany ary tsy hahatsiarovany intsony ny fahasahiranany!

⁸Sokafy ny vavanao hisolo ny moana mba hahazoan’izay rehetra resin’ny adim-piainana ny rariny.

⁹Sokafy ny vavanao ka mitsarà amin’ny fahamarinana ary omeo rariny ny ory sy ny mahantra.

¹⁰Iza no mahita vehivavy mahafatra-po? Fa ny tombany dia mihoatra lavitra noho ny voahangy.

¹¹Matoky azy ny fon’ny lahy ary tsy mitsahatra ny fanambinana azy.

¹²Soa no ataon-dRavehivavy aminy fa tsy ratsy, amin’ny andro rehetra iainany.

¹³Mizaha volon’ondry sy kofehy rongony izy ary mazoto miasa amin’ny tanany.

¹⁴Toy ny sambon’ny mpivaro-mandeha izy ka avy lavitra no itondrany ny haniny.

¹⁵Mifoha izy raha mbola alina ka manome hanina ho an’ny ankohonany ary manome anjara ho an’ny mpanompovaviny.

¹⁶Mihevitra saha izy ka mahazo azy; ny vokatry ny tanany no anaovany tanim-boaloboka.

¹⁷Misikina hery izy ary hatanjahiny ny sandriny.

¹⁸Hitany fa tsara ny tombom-barony ary tsy maty jiro mandritra ny alina izy.

¹⁹Mandray ny hazo fihazonam-bohavoha izy ary ny tanany dia mihazona ny ampela.

²⁰Manatsotra ny tanany amin’ny ory izy, eny, mamelatra ny tanany amin’ny mahantra.

²¹Tsy manahy ny orampanala ho amin’ny ankohonany izy fa ny ankohonany rehetra dia samy voatafy volon’ondry jaky avokoa.

²²Manao firakotra ho azy izy; ny fitafiany dia vita amin’ny lamba rongony fotsy madinika sy lamba volomparasy.

²³Ny lahy dia hajaina eo amin’ny vavahady* rehefa miara-mipetraka amin’ny loholona.

²⁴Manamboatra akanjo hariry madinika Ravehivavy ka mivarotra izany ary fehikibo no amidiny amin’ny mpivaro-mandeha.

²⁵Hery sy voninahitra no fitafiny ary ny andro ho avy dia ihomehezany.

²⁶Miteny amin’ny fahendrena izy ary fampianarana feno hatsaram-panahy no eo am-bavany.

²⁷Mitandrina tsara ny ataon’ny ankohonany izy ary tsy homana ny mofon’ny fahalainana.

²⁸Ny zanany mitsangana ka midera azy ho sambatra; ny lahy koa mitsangana ka midera azy hoe:

²⁹Maro ny zazavavy nanao soa, fa manoatra noho izy rehetra ianao.

³⁰Fitaka ny hatsaram-bika ary zava-poana ny hatsaran-tarehy, fa ny vehivavy matahotra NY TOMPO ihany no hoderaina.

³¹Omeo azy ny avy amin’ny vokatry ny tanany ary aoka ny asany hidera azy eo am-bavahady!