Read La Bible en Malgache Ohabolana 4 Bible Online

Ohabolana 4 - La Bible en Malgache bible

Ohabolana 4

¹Henoinareo, anaka, ny anatry ny ray, ary tandremo izany mba hahazoanareo ny fahalalana tsara.

²Fa anatra tsara no omeko anareo; aza mahafoy ny fampianarako.

³Fa zanak’Ikaky aho, sady malala no tokana teo imason’Ineny.

⁴Nampianatra ahy izy hoe: Aoka ny fonao hihazona ny teniko! Tandremo ny didiko dia ho velona ianao.

⁵Mikatsaha fahendrena, mikatsaha fahiratan-tsaina; aza hadinoina na ialana ny teny efa nataoko.

⁶Aza mahafoy azy fa hiaro anao izy; tiavo izy dia hitandrina anao.

⁷Ny fiandohan’ny fahendrena dia izao: Mikatsaha fahendrena; eny, lanio ny fanananao rehetra hividianana fahalalana tsara.

⁸Asandrato izy dia hanandratra anao; eny, hanome voninahitra anao izy raha fihininao;

⁹hasiany fehiloha mahafinaritra ny lohanao; eny, satroboninahitra tsara tarehy no homeny anao.

¹⁰Mihainoa anaka ka raiso ny teniko, dia hihamaro ny taona hiainanao.

¹¹Lalam-pahendrena no atoroko anao; eny, mitarika anao amin’ny lalana mahitsy aho.

¹²Raha mandeha ianao dia tsy ho voasembantsembana ny dianao; raha mihazakazaka ianao dia tsy ho tafintohina.

¹³Tano mafy ny fananarana ka aza avela hiala; hazòny izy fa ainao.

¹⁴Aza mankany amin’ny alehan’ny ratsy fanahy, ary aza mizotra amin’ny lalan’ny mpanao ratsy.

¹⁵Manalavira azy, aza mandalo eo akory; mivilia hiala aminy ka mizora amin’ny lalanao.

¹⁶Fa tsy matory ireny raha tsy efa nahavita izay ratsy, ary tsy mahita tory izy raha tsy efa nahalavo olona.

¹⁷Fa mihinana mofo avy amin’ny fanaovan-dratsy izy, ary misotro divay azo tamin’ny herisetra.

¹⁸Fa ny lalan’ny marina dia toy ny hazavana mamiratra, izay miha mazava hatrany, mandra-piposaky ny andro antoandro.

¹⁹Ny lalan’ny ratsy fanahy dia toy ny haizim-pito; tsy fantany akory izay mahatafintohina azy.

²⁰Anaka, tandremo ny teniko; atongilano ny sofinao hihaino izay ambarako.

²¹Aza avela hiala eo imasonao izany fa raketo ao anatin’ny fonao;

²²fa aina ho an’izay mahazo azy izany ary fanasitranana ho an’ny tenany manontolo.

²³Tandremo ny fonao mihoatra noho izay rehetra tokony hotandremana, fa avy ao aminy ny loharanon’ny aina.

²⁴Esory aminao ny fiteny mandainga, ary ampanalaviro anao ny molotra mamitaka.

²⁵Aoka ny masonao hijery mahitsy, ary ny hodimasonao hibanjina eo anoloanao.

²⁶Ataovy marina ny lalana alehan’ny tongotrao, ary aoka ho voalamina ny alehanao rehetra.

²⁷Aza mivily, na ho amin’ny ankavanana, na ho amin’ny ankavia; aoka hihataka amin’ny ratsy ny tongotrao.