Read La Bible en Malgache Ohabolana 5 Bible Online

Ohabolana 5 - La Bible en Malgache bible

Ohabolana 5

¹Anaka, tandremo ny fahendreko, ary atongilano ny sofinao ho amin’ny fahaizako mandinika

²mba hitahirizanao tsara ny fahaiza-mandinika sy hitandreman’ny molotrao ny fahalalana.

³Fa ny molotry ny vehivavy janga dia mitete toy ny tantely avy amin’ny tohotra, ary ny vavany dia malama noho ny diloilo;

⁴nefa ny farany dia mafaitra toy ny zava-mangidy, ary maranitra toy ny sabatra roa lela.

⁵Ny tongony dia midina ho any amin’ny fahafatesana, ary ny diany mizotra ho any amin’ny fitoeran’ny maty*.

⁶Tsy mandia ny lalan’ny fiainana izy fa manjenjena ka tsy fantany akory izay halehany.

⁷Koa mihainoa ahy ianareo anaka, ary aza mihataka amin’ny teny izay nolazaiko.

⁸Ampanalaviro azy ny alehanao, ary aza manakaiky ny varavaran’ny tranony,

⁹fandrao omenao ho an’ny sasany ny voninahitrao, ary ny taonanao ho an’izay olon-dozabe;

¹⁰fandrao hivokisan’ny olon-kafa ny fanananao, ary ho lasa any an-tranon’ny vahiny ny vokatry ny fisasaranao;

¹¹fandrao hitoloko ianao aorianan’izany, raha mihalevona ny nofonao sy ny tenanao

¹²ary hiteny ianao hoe: Nahoana re no nankahala fananarana aho? Ary nahoana no naniratsira ny fanitsiana ny foko?

¹³Ka tsy nihaino ny tenin’ny mpanoro hevitra ahy ary tsy nanongilana ny sofiko hihaino ny mpampianatra ahy?

¹⁴Efa saika azon’ny loza rehetra aho tao amin’ny fiangonana sy ny fivorian’ny olona.

¹⁵Misotroa avy amin’ny lavaka famorian-drano izay anao samirery, dia ny rano miboiboika avy amin’ny fantsakanao.

¹⁶Hitosaka eny ivelany va ny rano avy amin’ny loharanonao, ary eny an-dalambe ny ranovelonao?

¹⁷Aoka ho anao irery ihany izany fa aza iombonana amin’ny hafa.

¹⁸Aoka hotahina ny loharanonao, ary mifalia amin’ny vadin’ny fahatanoranao.

¹⁹Fa dieravavy maha te ho tia sy osidia tsara bika izy; dia aoka ny tratrany no hahafeno fifaliana anao mandrakariva, ary aoka ho feno faharavoravoana lalandava amin’ny fitiavany ianao.

²⁰Nahoana ianao anaka no ho renoka amin’ny fitiavana vehivavy jejo ka hamihina ny tratran’ny janga?

²¹Fa eo imason’NY TOMPO ny alehan’ny olona, ary dinihiny avokoa ny diany rehetra.

²²Mamandrika ny tenany ihany ny heloky ny ratsy fanahy, ary ny kofehin’ny fahotany no hihazona azy.

²³Maty izy noho ny tsy nahazoany fananarana, very izy noho ny haben’ny hadalany.