Read La Bible en Malgache Ohabolana 6 Bible Online

Ohabolana 6 - La Bible en Malgache bible

Ohabolana 6

¹Anaka, raha niantoka ny namanao ianao, ary nandray tanana hiantoka vahiny,

²ka voafandriky ny teny nataonao, ary voasingotry ny teny noteneninao,

³dia izao no ataovy anaka mba hanafaka ny tenanao satria tonga eo am-pelatanan’ny namanao ianao: Mandehana miankohoka sy mifona mafy amin’ny namanao;

⁴aza avela hahita tory ny masonao ary aza avela hilondolondo ny hodimasonao;

⁵afaho ny tenanao toy ny gazela miala amin’ny tanan’ny mpihaza, ary toy ny voronkely miala amin’ny tanan’ny mpamandrika.

⁶Mandehana any amin’ny vitsika, ry ilay malaina; diniho ny fanaony ka mba hendre.

⁷Tsy manana komandy, na mpanara-maso, na mpanapaka izy,

⁸nefa mamory ny haniny amin’ny fahavaratra, ary manangona ny fihinany amin’ny fararano.

⁹Mandra-pahoviana no mbola handry ihany ianao, ry ilay malaina? Rahoviana no hifoha amin’ny torimasonao ianao?

¹⁰Mbola hatory kely ihany, mbola ho renoka kely ihany ary mbola hanohon-tanana kely hatory.

¹¹Dia ho tonga toy ny mpirenireny hamely anao ny fahantranao, ary ny fahasahirananao dia ho toy ny jiolahy mirongo fiadiana.

¹²Ny olona tena ratsy fanahy sy mpanao ratsy, dia ilay mandehandeha manao teny misy fitaka

¹³izay mipy maso sy manao famantarana amin’ny tongony, ary manao baiko amin’ny rantsantanany;

¹⁴hafetsen-dratsy no ao am-pony, mihevi-dratsy mandrakariva izy sady mamafy adilahy.

¹⁵Noho izany dia ho avy tampoka ny loza hanjo azy; indray mipy maso no haha torotoro azy ka tsy hisy fanafana.

¹⁶Zavatra enina no halan’NY TOMPO, eny, fito no fahavetavetana eo anatrehany:

¹⁷Ny fijery mianjonanjona, ny lela fandainga, ny tanana mandatsaka ny ran’ny tsy manan-tsiny,

¹⁸ny fo mamorona sain-dratsy, ny tongotra malaky mihazakazaka hanao ratsy,

¹⁹ny vavolombelona mandainga izay milaza lainga ary ny mamafy ady eo amin’ny mpirahalahy.

²⁰Anaka, tandremo ny didin’ny rainao ary aza mahafoy ny fampianaran’ny reninao.

²¹Afatory amin’ny fonao mandrakariva ireo ary afehezo eo am-bozonao.

²²Raha mandeha ianao dia hitari-dalana anao ireo, raha mandry ianao dia hiambina anao izy, raha mifoha ianao dia hamelona eritreritra anao izy.

²³Fa jiro ny didy, ary fanazavana ny fampianarana, ary lalan’ny fiainana ny anatra ataon’ny fitaizana,

²⁴hiarovana anao amin’ny vehivavy ratsy fanahy sy amin’ny fandrobohan’ny lelan’ny vehivavy janga.

²⁵Aoka ny fonao tsy haniry ny hatsaran-tarehiny ary aoka tsy hahazo anao amin’ny hodimasony izy.

²⁶Fa sombi-mofo iray ihany dia ahazoana vehivavy janga iray, nefa ny vehivavy manambady kosa dia mamandrika aina sarobidy.

²⁷Mahatondra afo ao amin’ny paosin’akanjony va ny olona ka tsy ho may ny akanjony?

²⁸Misy mahadia vainafo va ka tsy ho may ny tongony?

²⁹Dia toy izany izay mankany amin’ny vadin’ny namany; tsy ho afa-tsiny izay mikasika azy.

³⁰Tsy manome tsiny ny mpangalatra ny olona raha maka zavatra hahavoky ny tenany izy satria noana;

³¹fa raha tratra kosa izy dia hampanonerina avo fito heny ka hanome ny fananany rehetra izay ao an-tranony.

³²Izay mijangajanga amin’ny vehivavy dia tsy ampy saina; izay ta hanimba tena no manao izany.

³³Voadaroka sady afa-baraka izy ary tsy ho voafafa ny tondro molotra manjo azy.

³⁴Fa ny fahasaro-piaro dia mampirehitra ny fahatezeran’ny lehilahy, koa tsy hamindra fo izy amin’ny andro hamaliany;

³⁵tsy handray vola ho fanakona-maso akory izy; tsy hanaiky izy, na dia atao maro aza ny fanomezana.