Read La Bible en Malgache Ohabolana 7 Bible Online

Ohabolana 7 - La Bible en Malgache bible

Ohabolana 7

¹Anaka, tandremo ny teniko ary raketo ao aminao ny didiko.

²Tandremo ny didiko dia ho velona ianao ary tandremo toy ny anakandriamasonao ny lalànako.

³Afehezo eo amin’ny rantsantananao ireny ary soraty ao am-ponao tahaka ny amin’ny vato fisaka ireny.

⁴Lazao amin’ny fahendrena hoe: Anabaviko ianao! Ary ny fahaiza-misaina dia antsoy hoe: Havako akaiky ianao

⁵mba hiarovana anao amin’ny vehivavy jejo, dia amin’ny vehivavy janga izay manao teny manodoka.

⁶Fa teo amin’ny varavarankelin’ny tranoko, dia teo amin’ny makarakara, no nitsirihako

⁷ka nahita ny iray tamin’ireny kely saina ireny aho; eny, nandinika ireo tanora aho ka nahita zazalahy iray tsy ampy saina

⁸izay nandeha tamin’ny lalana akaikin’ny zoron-tranon’ny vehivavy janga sady nizotra moramora nankany an-tranony,

⁹tamin’ny takariva ilay somambisamby iny ary tamin’ny alimbe.

¹⁰Dia indro, nisy vehivavy nitsena azy sady manao fitafin’ny vehivavy janga ary feno fanangolena ao am-pony.

¹¹Sady vavàna izy no maniratsira, tsy mahajanona an-trano ny tongony;

¹²vetivety izy eny an-dalambe, vetivety eny an-tsena, ary mamitsaka eny an-joron-dalana rehetra eny izy.

¹³Dia nisavika ilay tanora izy ka nanoroka azy sady nisolantsolana taminy ary nilaza hoe:

¹⁴Nivoady hanatitra fanati-pihavanana aho ary androany no nanefako ny voadiko.

¹⁵Koa nivoaka hitsena anao aho mba hitady fatratra anao ka nahita anao tokoa.

¹⁶Ny fandrianako dia efa nasiako firakotra tsara, lamba rongony misoratsoratra avy any Ejipta;

¹⁷efa norarahako zavamanitra ny fandrianako, dia miora sy hazomanitra ary havozomanitra.

¹⁸Andeha, aoka isika hivoky fitia mandra-paharain’ny andro, aoka hanaram-po amin’ny fitiavana isika.

¹⁹Tsy ato an-trano mantsy ny vadiko fa lasa nivahiny any lavitra;

²⁰ny kitapom-bola dia noentiny any an-tanany ary tsy hody izy raha tsy feno ny volana.

²¹Tamin’ny teny maro no nandreseny lahatra azy; tamin’ny fandokafan’ny molony no nitaomany azy.

²²Dia nandeha nanaraka azy niaraka tamin’izay ilay zatovo, tahaka ny omby entina hovonoina, ary tahaka ny adala gadraina ho famaizana azy,

²³ambara-piboroaky ny zana-tsipìka amin’ny atiny, ary tahaka ny vorona mamantana amin’ny fandrika ka tsy fantany fa hamono ny ainy izany.

²⁴Koa mihainoa ahy ianareo, anaka, ary tandremo ny teny ataoko!

²⁵Aoka tsy hivily ho any amin’ny lalany ny fonareo ary aza mania ho amin’ny alehany.

²⁶Fa betsaka no naripany ka maty, ary ny mahery indrindra aza dia matiny avokoa.

²⁷Ny tranony dia lalana mankany amin’ny fitoeran’ny maty*, eny, midina ho any amin’ny efitranon’ny fahafatesana.