Read La Bible en Malgache Ohabolana 8 Bible Online

Ohabolana 8 - La Bible en Malgache bible

Ohabolana 8

¹Tsy miantso va ny Fahendrena? Ary tsy manandra-peo va ny fahalalana?

²Eo an-tampon’ny toerana avo amoron-dalana sy eo an-tsampanan-dalana no ijoroany.

³Eo anilan’ny vavahady* amin’ny fidirana ho ao an-tanàna sy eny amin’ny vavahady no iantsoany mafy hoe:

⁴Ianareo no antsoiko, ry olona, ary ny feoko dia ho amin’ny zanak’olombelona!

⁵Manàna fahamalinana, ry kely saina! Aoka hahira-tsaina ianareo, ry adala!

⁶Henoy, fa hilaza zava-dehibe aho ary ny hilaza ny mahitsy no isokafan’ny molotro.

⁷Fa ny marina ihany no holazain’ny vavako, ary amin’ny molotro dia fahavetavetana ny ratsy;

⁸marina ny teny rehetra ataoko, tsy misy fiolakolahana na fitaka ao aminy.

⁹Miharihary avokoa ireny amin’ny mazava saina, ary mahitsy amin’ny efa nahazo fahalalana.

¹⁰Ny anatro no raiso fa tsy ny volafotsy; aleo ny fahalalana toy izay ny volamena voafantina.

¹¹Fa ny fahendrena dia tsara noho ny voahangy; tsy azo ampitahaina aminy ny zavatra mampitsiriritra rehetra.

¹²Izaho Fahendrena dia miara-monina amin’ny fahamalinana ary hitako ny fahaizana misaina mazava.

¹³Ny fankahalana ny ratsy no fahatahorana NY TOMPO; ny fiavonavonana, ny fireharehana, ny lalana ratsy ary ny teny lainga dia samy halako avokoa.

¹⁴Ahy ny tolo-tsaina sy ny tena fahendrena. Izaho no fahalalana, izaho no manan-kery.

¹⁵Amin’ny alalako no anjakan’ny mpanjaka sy amoahan’ny mpanapaka ny didy aman-dalàna araka ny rariny;

¹⁶amin’ny alalako no anapahan’ny mpitondra sy ny lehibe ary ny mpitsara rehetra amin’ny tany.

¹⁷Tiako izay tia ahy ary izay fatra-pitady ahy dia hahita ahy.

¹⁸Ato amiko ny harena sy ny voninahitra, eny, ny harena mateza sy ny fahamarinana.

¹⁹Ny vokatra avy amiko dia tsara noho ny volamena, eny, noho ny volamena tsy miharo aza, ary mihoatra noho ny volafotsy voafantina ny fitomboan’ny harenako.

²⁰Eo amin’izay alehan’ny fahamarinana no izorako, ary mihazo eo afovoan’ny lalan’ny fitsarana marina

²¹mba hampandovako harena izay tia ahy sy hamenoako ny trano fitahirizany.

²²Namboatra ahy ho fiandohan’ny lalany NY TOMPO, ho voalohany amin’ny asany hatramin’ny taloha.

²³Notendreny hatramin’ny fahagola aho, eny, hatramin’ny voalohany indrindra, fony tsy mbola ary ny tany.

²⁴Fony tsy mbola nisy ny lalina no efa teraka aho, fony tsy mbola ary ny loharano miboiboika be,

²⁵fony tsy mbola naorina ny tendrombohitra, fony tsy mbola nisy ny havoana no efa teraka aho,

²⁶fony tsy mbola natao ny tany, na ny saha, na ny vovo-tany voalohany amin’izao rehetra izao.

²⁷Tamin’ny nampiorenany ny lanitra dia teo aho, tamin’ny namaritany ny habakabaka tambonin’ny lalina,

²⁸tamin’ny nampitoerany ny rahona eny ambony ka niboiboika fatratra ny loharanon’ny lalina,

²⁹tamin’ny nanisiany faritra ho an’ny ranomasina mba tsy hahazoan’ny rano mihoatra ny fetrany, rehefa nandidy ny amin’ny fanorenan’ny tany Izy,

³⁰dia mpita-marika teo anilany aho sady ravoravo isanandro isanandro ka nilalao mandrakariva teo anatrehany;

³¹eny, nahafaly ahy ny tany nataony honenana ary naharavoravo ahy ny zanak’olombelona.

³²Koa mihainoa ahy ianareo anaka; fa sambatra izay manaraka ny diako!

³³Mihainoa anatra ka hendre, fa aza manao tsirambina.

³⁴Sambatra izay olona mihaino ahy ka miari-tory mandrakariva eo amin’ny varavarako ary miambina eo amin’ny tolanam-baravarako!

³⁵Fa izay mahita ahy dia mahita fiainana, sady mahazo sitraka amin’NY TOMPO.

³⁶Izay diso ahy kosa dia mampidi-doza amin’ny tenany; izay rehetra mankahala ahy dia tia fahafatesana.