Read La Bible en Malgache Mpitoriteny 1 Bible Online

Mpitoriteny 1 - La Bible en Malgache bible

Mpitoriteny 1

¹Ny tenin’i Mpitoriteny, zanak’i Davida, mpanjaka tany Jerosalema.

²Tena zava-poana, hoy i Mpitoriteny, tena zava-poana, eny, zava-poana ny zavatra rehetra!

³Inona moa no soa azon’ny olona amin’ny fisasarany rehetra izay isasarany etỳ ambanin’ny masoandro?

⁴Lasa ny taranaka iray ary mandimby kosa ny taranaka hafa; nefa ny tany dia mbola maharitra eo ihany.

⁵Miposaka ny masoandro ary milentika ny masoandro sady miriotra ho any amin’ny toerana izay niposahany.

⁶Mianatsimo ny rivotra dia mihodina mianavaratra, mivezivezy mandrakariva izy ka miverimberina mihodidina foana.

⁷Ny renirano rehetra dia samy mankany amin’ny ranomasina nefa tsy mety feno ny ranomasina; any amin’izay falehan’ny renirano ihany no iverenany indray.

⁸Manasatra ny zavatra rehetra ka tsy misy olona mahalaza izany intsony; ny maso dia tsy afa-po mijery, ary ny sofina dia tsy afa-po mihaino.

⁹Izay efa teo ihany no ho tonga indray ary izay efa natao ihany no mbola haverina indray; tsy misy zava-baovao etỳ ambanin’ny masoandro.

¹⁰Raha misy zavatra lazaina hoe: E! Ity no vaovao, dia ilay efa teo ela tany amin’ny andro talohantsika ihany izany.

¹¹Tsy tsaroana ny taloha ary ny ho avy koa dia tsy ho tsaroan’ny taranaka manaraka.

¹²Izaho Mpitoriteny dia mpanjakan’ny Israely tany Jerosalema.

¹³Tamin’ny foko manontolo no nitadiavako sy nikatsahako tamim-pahendrena ny zavatra rehetra izay atao atỳ ambanin’ny lanitra; asa mavesatra nomen’Andriamanitra hisasaran’ny zanak’olombelona izany.

¹⁴Efa hitako ny zavatra rehetra izay atao etỳ ambanin’ny masoandro, fa indro, zava-poana sy sambo-drivotra avokoa izany rehetra izany.

¹⁵Ny meloka dia tsy mety ho tonga mahitsy ary ny tsy ao dia tsy mba azo isaina.

¹⁶Hoy aho anakampo: Indro, nanangona fahendrena be dia be mihoatra noho izay rehetra talohako teto Jerosalema aho; eny, nahita fahendrena sy fahalalana betsaka aho.

¹⁷Niasa saina aho mba hahalala ny fahendrena sy hamantatra ny fahadalana; dia fantatro fa sambo-drivotra foana koa izany

¹⁸satria izay be fahendrena dia be fahasahiranan-tsaina ary izay mitombo fahalalana dia mitombo fanaintainana.