Read La Bible en Malgache Mpitoriteny 10 Bible Online

Mpitoriteny 10 - La Bible en Malgache bible

Mpitoriteny 10

¹Ny fatin-dalitra dia mahamaimbo sy mampamorivory ny menaky ny mpampiharo zavamanitra; toy izany ny hadalana kely izay mavesatra noho ny fahendrena sy ny voninahitra.

²Ny fon’ny hendry dia mitondra azy ho amin’izay tsara, fa ny fon’ny adala kosa dia mitondra azy any amin’izay tsy izy.

³Ary koa, rehefa mandeha eny an-dalambe ny adala dia tonga tsy ampy ny fisainany ka milaza tena amin’ny olona rehetra izy fa adala.

⁴Raha tezeran’ny mpanapaka ianao, aza miala amin’ny toeranao; fa ny fahatoniana dia mahasakana fahotana lehibe.

⁵Misy ratsy hitako atỳ ambanin’ny masoandro, toa vokatry ny fahadisoana tsy nahy nataon’ny mpanapaka izany:

⁶Asandratra ho amin’ny toerana ambony indrindra ny adala, nefa misy mpanankarena mipetraka amin’ny toerana ambany.

⁷Efa hitako ny mpanompo mitaingin-tsoavaly, nefa ny mpanapaka dia mandeha an-tongotra toy ny mpanompo.

⁸Izay mihady lavaka no ho latsaka ao ary izay mandrava tamboho no hokekerin’ny menarana.

⁹Izay manongotra vato no ho voaratrany, ary izay mamaky hazo no ho voany.

¹⁰Raha dombo ny fitaovana vy ka tsy asaina dia mila ampiasana hery be; fa ny fahendrena no mahasoa, satria mahalavorary ny raharaha izany.

¹¹Raha manaikitra ny menarana satria tsy nanan-kery ny ody dia tsy misy ilàna ny mpisikidy mahay mampiasa ny vavany.

¹²Fahasoavana ny teny aloaky ny vavan’ny hendry, fa ny molotry ny adala kosa dia mandevona ny tenany.

¹³Ny fiandohan’ny teny aloaky ny vavany dia fahadalana, ary ny fiafaran’ny teniny dia fahaverezan-tsaina mampidi-doza.

¹⁴Maro teny ny adala. Tsy misy olombelona mahafantatra izay ho avy; ary iza no mahalaza aminy izay ho avy any aorianany?

¹⁵Ny fisasaran’ny adala dia mahareraka azy fa ny lalana mankany an-tanàna aza dia tsy fantany akory.

¹⁶Lozanao, ry tany, raha tovolahy no mpanjakanao, ary ny lehibenao dia mihinana dieny maraina!

¹⁷Sambatra kosa ianao, ry tany, raha olona tena mendri-kaja no mpanjakanao, ary ny lehibenao dia homana amin’izay fotoana mety mba hampatanjaka ny tenany fa tsy ny hampahamamo azy!

¹⁸Ny fahalainana no mampianjera ny sakamandimby, ary ny hakamoan’ny tanana no mampitete ny trano.

¹⁹Atao ho fialam-boly ny fisakafoanana; ny divay no maharavoravo ny aina, ary ny vola no mamaha ny olana rehetra.

²⁰Aza manozona ny mpanjaka na dia amin’ny eritreritrao aza ary aza manozona ny mpanankarena na dia ao anatin’ny efitrano fandrianao aza; fa na dia ny voromanidina aza ange ka hitondra ny feo ary na dia ny manana elatra aza dia hanambara ny teny.