Read La Bible en Malgache Mpitoriteny 4 Bible Online

Mpitoriteny 4 - La Bible en Malgache bible

Mpitoriteny 4

¹Hitako koa ny fampahoriana rehetra atao etỳ ambanin’ny masoandro ka indro ny ranomason’ny ampahorina nefa tsy misy izay mampionona azy; hery no eo anilan’ny mpampahory azy nefa tsy misy izay mampionona azy.

²Ny maty izay efa maty ela dia heveriko fa sambatra noho ny velona izay mbola velona,

³nefa sambatra indray noho ny maty sy ny velona aza izay tsy mbola ary akory ka tsy mahita ny ratsy atao etỳ ambanin’ny masoandro.

⁴Ary hitako ny fisasarana rehetra sy ny fahombiazana rehetra fa avy amin’ny fifampialonan’ny olona ireny. Zava-poana sy sambo-drivotra koa izany.

⁵Ny adala dia mamihin-tanana ka homana ny tenany.

⁶Tsara ny fialan-tsasatra eran’ny tanana an’ila noho ny fisasarana eran’ny tanana roa nefa sambo-drivotra foana.

⁷Ary izao koa no zava-poana hitako etỳ ambanin’ny masoandro:

⁸Misy olona mitoetra irery ka tsy mana-namana, tsy manan-janaka, tsy manana rahalahy aza, nefa tsy misy farany ny fisasarany samihafa ary ny masony dia tsy afa-po amin’ny harena ka ilazany hoe: Ho an’iza no isasarako sy tsy ananako fahasambarana? Zava-poana sy asa mahareraka koa izany.

⁹Tsara ny roa noho ny iray fa misy valiny tsara ny fisasarany.

¹⁰Raha misy lavo dia arenin’ny namany; fa mahantra ny tokana izay lavo nefa tsy manana namana hanarina azy.

¹¹Ary koa, raha miara-mandry ny roa dia mafana izy; fa hatao ahoana no hampahafana ny irery?

¹²Raha misy maharesy ny irery aza, ny roa kosa dia tsy ho leony; ny mahazaka telo olana dia tsy mora tapahina.

¹³Aleo zatovo mahantra nefa hendry toy izay mpanjaka antitra adala ka tsy laitra anarina intsony,

¹⁴na dia avy tao an-tranomaizina aza no nivoahany hanjaka ary na dia tao anatin’ny fahantrana aza no nahaterahany hitondra ny fanjakany.

¹⁵Hitako ny miaina rehetra izay mandeha etỳ ambanin’ny masoandro, manotrona ilay zazalahy izay mitsangana handimby ny efa teo.

¹⁶Tsy hita isa ny fitambaran’ny vahoaka, dia izay rehetra anjakany; nefa izay ho avy any aoriana dia tsy mba hahita fifaliana aminy. Izany koa dia zava-poana sy sambo-drivotra.

¹⁷Tandremo ny tongotrao raha mankao amin’ny tranon’Andriamanitra ianao; fa ny manatona hihaino no tsara noho ny fanateran’ny adala fanatitra satria tsy fantatr’ireny akory fa ratsy ny ataony.