Read La Bible en Malgache Mpitoriteny 5 Bible Online

Mpitoriteny 5 - La Bible en Malgache bible

Mpitoriteny 5

¹Aza haingam-bava, ary aoka tsy halaky hanonona teny eo anatrehan’Andriamanitra ny fonao; fa Andriamanitra dia any an-danitra ary ianao dia etỳ an-tany, koa aoka ho vitsy ny teninao.

²Fa ny haben’ny fisasarana no mahatonga ny nofinofy, ary ny haben’ny teny no isehoan’ny rediredin’ny adala.

³Raha mivoady amin’Andriamanitra ianao, aza manao ampitso lava, fa tsy ankasitrahany ny adala; koa efao ny voadinao.

⁴Aleo tsy mivoady toy izay mivoady nefa tsy mahefa.

⁵Aza avela hahatonga heloka amin’ny tenanao ny vavanao, ary aza miteny eo imason’ny anjelin’Andriamanitra hoe: Niteny tsy nahy aho. Nahoana no ho tezitra amin’ny teninao Andriamanitra ka hanimba ny asan’ny tananao?

⁶Fa amin’ny haben’ny nofinofy dia misy zava-poana, ary toy izany koa ny haben’ny teny. Koa matahora an’Andriamanitra.

⁷Raha hitanao any amin’ny fari-piadidiana iray ny fampahoriana ny mahantra mbamin’ny famadihana ny fitsarana sy ny rariny dia aza gaga amin’izany; fa misy ambony kokoa mibanjina ny ambony ary mbola misy ambony noho ireo indray aza.

⁸Fa ny tombontsoa avy amin’ny tany dia ho an’ny rehetra ary na ny mpanjaka aza dia miankina amin’ny tany famboly.

⁹Izay tia vola dia tsy ho voky vola; ary izay fatra-pitia harena be dia tsy ho vokin’ny fitomboan-karena. Zava-poana koa izany.

¹⁰Raha mitombo ny fananana dia mitombo koa ny mpihinana azy; ary inona no soa azon’ny tompony afa-tsy ny mijery maso azy fotsiny ihany?

¹¹Mamy ny torimason’ny mpiasa na homan-kely izy na homam-be; fa ny haben’ny fananan’ny mpanankarena kosa no tsy ahitany tory.

¹²Misy ratsy mandrera-po hitako etỳ ambanin’ny masoandro, dia ny harena tehirizin’ny tompony nefa mampidi-doza amin’ny tenany;

¹³sady levona izany harena izany noho ny fampiasany azy tamin’ny asa ratsy, dia miteraka zazalahy izy nefa tsy misy na inona na inona eny an-tanany.

¹⁴Toy ny nivoahany mitanjaka avy tany an-kibon’ny reniny, dia toy izay niaviany ihany no hiverenany; tsy hisy na inona na inona hoentin’ny tanany ho valin’ny fisasarany.

¹⁵Ratsy mandrera-po koa izany fa tsy misy hafa amin’izay niaviany no handehanany; ary inona no soa azony noho ny nisasarany ho an’ny rivotra?

¹⁶Sady laniny ao amin’ny maizina ny androny rehetra ary feno fahasosorana sy mararirary anaty izy sady manao fo lentika.

¹⁷Indro, efa hitako izay soa sy izay tsara, dia ny mihinana sy misotro ary mifaly amin’ny fisasarana rehetra izay isasaran’ny olona etỳ ambanin’ny masoandro mandritra ny andro vitsy omen’Andriamanitra azy hiainany; fa izany no anjarany.

¹⁸Ary izao koa, ho an’ny olona rehetra izay omen’Andriamanitra vola aman-karena sady omeny fahefana hihinanany azy sy hahazoany ny anjarany ary hifaliany amin’ny fisasarany, dia fanomezan’Andriamanitra izany.

¹⁹Fa tsy hahatsiaro loatra ny andro niainany izy satria ny fahafinaretana no amenoan’Andriamanitra ny fony.