Read La Bible en Malgache Mpitoriteny 7 Bible Online

Mpitoriteny 7 - La Bible en Malgache bible

Mpitoriteny 7

¹Tsara ny laza soa noho ny menaka manitra ary ny andro ahaterahana dia tsy mahaleo ny andro ahafatesana.

²Tsara ny mankany amin’ny trano misy fisaonana noho ny mankany amin’ny trano misy fanasana, fa ho amin’io no hiafaran’ny olombelona rehetra, koa ny velona dia handatsaka izany am-po.

³Tsara ny alahelo noho ny hehy, fa na dia malahelo aza ny tarehy, mety ho tsara ihany ny fo.

⁴Ny fon’ny hendry dia ao amin’ny trano misy fisaonana, fa ny fon’ny adala kosa dia any amin’ny trano misy fifaliana.

⁵Tsara ny mihaino ny anatra mafy ataon’ny hendry noho ny mihaino ny hiran’ny adala.

⁶Toy ny firefodrefotry ny tsilo ao ambanin’ny vilany, dia tahaka izany ny fihomehezan’ny adala. Izany koa aza dia zava-poana.

⁷Ny fampahoriana dia mahavery saina ny hendry, ary ny kolikoly dia mahasimba ny fo.

⁸Tsara ny fiafaran’ny raharaha iray noho ny fiandohany; tsara ny mahari-po noho ny miavonavona.

⁹Aoka tsy halaky tezitra ianao, fa ny fahatezerana dia milafika ao am-pon’ny adala.

¹⁰Aza milaza hoe: Ahoana no nahatsara ny andro taloha noho ny ankehitriny? Fa tsy avy amin’ny fahendrena no anontanianao izany.

¹¹Tsara tahaka ny lova ny fahendrena, sady zava-mahasoa ho an’izay mahita masoandro izany

¹²satria fialokalofana ny fahendrena ary fialokalofana ny vola; fa ny mahatsara ny fahalalana dia izao: Maharo ny ain’izay manana azy ny fahendrena.

¹³Diniho ny asan’Andriamanitra; fa iza moa no mahahitsy izay nataony meloka?

¹⁴Amin’ny andro mahafaly dia mifalia ary amin’ny andro mahory dia mieritrereta; fa Andriamanitra no nanao ny iray, toy ny nanaovany ny iray koa, mba tsy hahitan’ny olombelona izay ho avy any aorianany akory.

¹⁵Izao rehetra izao dia efa hitako tamin’ny androko mandalo foana: misy marina maty noho ny fahamarinany ary misy meloka ela velona noho ny faharatsiany.

¹⁶Aza marina loatra ary aza miseho ho hendry loatra; nahoana no hosimbanao ny tenanao?

¹⁷Aza ratsy loatra ary aza adala; nahoana no ho faty raha tsy mbola tonga ny andronao?

¹⁸Tsara raha mitana iroa ianao, nefa aza mampiala ny tananao amin’itsy; fa izay matahotra an’Andriamanitra dia ho afaka amin’izany rehetra izany.

¹⁹Ny fahendrena dia mahatonga ny hendry hahery kokoa noho ny mpanapaka folo ao an-tanàna.

²⁰Fa tsy misy olona marina ambonin’ny tany izay manao ny tsara ka tsy manota.

²¹Aza mihaino izay teny rehetra tenenina, fandrao handre ny mpanomponao manozona anao ianao

²²satria fantatrao tsara fa matetika ny tenanao koa dia mba efa nanozona ny sasany ihany.

²³Izany rehetra izany dia nozahako toetra tamin’ny fahendrena. Hoy aho: Ho hendry aho. Kanjo lavitra ahy izany.

²⁴Eny, lavitra ny zava-misy; lalina dia lalina! Iza no hahatakatra azy?

²⁵Nitodika aho ka nampiasaiko ny saiko mba hahalala, handinika ary hitady fahendrena sy izay anton’ny zavatra rehetra ka hahafantatra ny haratsiam-panahy ho fahadalana, ary ny fahadalana ho fahaverezan-tsaina.

²⁶Ary hitako fa mangidy noho ny fahafatesana ny vehivavy, rehefa izy no fandrika ary harato ny fony, sady famatorana ny tanany; nefa izay olona ankasitrahan’Andriamanitra dia ho afa-mandositra azy fa ny mpanota ihany no ho azony.

²⁷Indro, izany no hitako, hoy i Mpitoriteny, rehefa nandinika ny zavatra tsirairay aho mba hahitako izay antony.

²⁸Izay mbola notadiaviko koa nefa tsy hitako, dia izao: Lehilahy iray no hitako ho marina tao amin’ny arivo; fa tao amin’ny vehivavy rehetra dia tsy nisy hitako na dia iray akory aza.

²⁹Indro, izao ihany no hitako: Nataon’Andriamanitra mahitsy ny olombelona, fa izy tenany ihany no namorona tetika maro.