Read La Bible en Malgache Mpitoriteny 8 Bible Online

Mpitoriteny 8 - La Bible en Malgache bible

Mpitoriteny 8

¹Iza no tahaka ny hendry? Ary iza no mahalala izay anton-javatra ao ambadiky ny zava-miseho? Ny fahendren’ny olona dia mahamiramirana ny tarehiny ary manova ny endriny masiaka.

²Hoy aho: Tandremo ny didin’ny mpanjaka, ary izany dia noho ny fianianana nataon’Andriamanitra.

³Aza malaky manalavitra azy; aza mikikitra amin’ny raharaha ratsy; fa na inona na inona sitrany dia azony atao avokoa;

⁴fa ny tenin’ny mpanjaka dia tenim-pahefana; koa iza no mahazo miteny aminy hoe: Inona no ataonao?

⁵Izay mitandrina ny didy tsy mba hahita loza; ary ny saina hendry dia mahalala ny fotoana sy ny fitsarana;

⁶fa samy manana ny fotoanany sy ny fitsarana azy ny zava-mitranga rehetra, satria ny ratsy nataon’ny olona dia mitambesatra aminy.

⁷Fa tsy mahafantatra izay ho avy izy, sady iza no hampahafantatra azy izay hiavian’izany?

⁸Tsy misy olona manan-kery hahatana ny fofonainy, na manana fahefana ny amin’ny andro hahafatesany; tsy misy afa-miala rehefa misy ady ary ny ratsy fanahy dia tsy ho voavonjin’ny haratsiam-panahiny.

⁹Izany rehetra izany dia efa hitako avokoa tamin’ny nampiasako ny saiko nandinika ny asa rehetra atao etỳ ambanin’ny masoandro. Misy andro anamparan’ny olona fahefana amin’ny namany ka ampidirany loza aminy.

¹⁰Tamin’izany dia hitako ny ratsy fanahy nalevina; nandeha ny olona, ary niala avy teo amin’ny fitoerana masina ka hadino tao an-tanàna ny asa ratsy nataon’ireo. Izany koa dia zava-poana.

¹¹Saingy tsy tanterahina haingana ny didy ho famaliana ny ratsy natao dia feno faniriana hanao asa ratsy ny fon’ny zanak’olombelona ao anatiny.

¹²Eny, fa na manao asa ratsy injato aza ny mpanota ka ela velona ihany, dia fantatro kosa fa hisy soa ho an’izay matahotra an’Andriamanitra, dia izay matahotra eo anatrehany.

¹³Tsy hisy soa ho an’ny ratsy fanahy; fa ho toy ny aloka izy ka tsy haharitra ela satria tsy matahotra eo anatrehan’Andriamanitra.

¹⁴Izao koa no zava-poana izay atao etỳ ambonin’ny tany: Misy olo-marina iharan-javatra izay tokony ho anjaran’ny ratsy fanahy; ary misy ratsy fanahy mahazo izay tokony ho anjaran’ny marina. Hoy aho: Izany koa dia zava-poana.

¹⁵Dia noderaiko ny fifaliana satria tsy misy mahasoa ny olona etỳ ambanin’ny masoandro afa-tsy ny mihinana sy ny misotro ary ny miravoravo ka izany no hanara-dia azy amin’ny fisasarany mandritra ny andro hiainany izay nomen’Andriamanitra azy etỳ ambanin’ny masoandro.

¹⁶Raha nampiasaiko ny saiko hahalala fahendrena sy hahita ny asa atao etỳ ambonin’ny tany, satria misy tsy mahita torimaso na andro na alina,

¹⁷dia hitako avokoa ny asan’Andriamanitra, fa tsy takatry ny sain’ny olona ny asa atao etỳ ambanin’ny masoandro; koa na dia mikely aina hitady izany aza ny olona tsy ho hitany; eny, raha milaza hahafantatra izany aza ny hendry dia tsy hisy hahazoany mamantatra izany akory.