Read La Bible en Malgache Tononkiran’i Solomona 1 Bible Online

Tononkiran’i Solomona 1 - La Bible en Malgache bible

Tononkiran’i Solomona 1

¹Ny tononkira tsara indrindra, izay an’i Solomona.

²Enga anie ka hanoroka ahy amin’ny fanorohan’ny vavany izy! Fa tsara noho ny divay ny fitiavanao.

³Mani-pofona ny menakao tsara, menaka manitra voaidina ny anaranao, koa izany no itiavan’ny tovovavy anao.

⁴Tariho aho hanaraka anao, dia hiara-hihazakazaka isika; noentin’ny mpanjaka ho ao an’efitranony aho. Hifaly sy hiravoravo ao isika; hankalazaintsika mihoatra noho ny divay ny fitiavanao; fitiavana marina no itiavany anao.

⁵Mivalomainty aho, nefa tsara tarehy, ry zanakavavin’i Jerosalema, toy ny tranolain’i Kedara, toy ny ambaindain’i Solomona.

⁶Aza mibanjina ahy fa mivalomainty aho satria nodanihin’ny hainandro. Tezitra tamiko ny zanak’Ineny; notendreny ho mpiandry ny tanim-boalobony aho; nefa ny tanim-boaloboko kosa, izay ahy, dia tsy mba nambenako.

⁷Ambarao amiko, ry ilay tian’ny foko, aiza no iandrasanao ny ondrinao, aiza no andriandrianao rehefa antoandro? Fa nahoana aho no ho tahaka izay mirenireny foana eny amin’ny andian’ondrin’ny namanao?

⁸Raha tsy fantatrao, ry tsara tarehy indrindra amin’ny vehivavy, dia mandehana araho ny dian’ny andian’ondry aman’osy, ary andraso eny amin’ny tranolain’ny mpiandry ondry ny zanak’osinao.

⁹Rahavako, ianao dia ampitahaiko amin’ny soavalivaviko mitarika ny kalesy fitondran’i Farao miady.

¹⁰Mahatsara ny tarehinao ireo voahangy voatohy; manendrika ny vozonao ireo rojo feno perla.

¹¹Rojo volamena mitohitohy volafotsy kiboribory no ampiambozonanay anao.

¹²Raha eo amin’ny latabany ny mpanjaka dia mamerovero tsara ny nardako.

¹³Amiko, ny malalako dia miora iray fehezana madinika mandry eo an-tratrako.

¹⁴Amiko, ny malalako dia salohim-boninkazo any an-tanim-boalobok’i Eny-Gedỳ.

¹⁵Indro, tsara tarehy ianao, Rahavako; indro, tsara tarehy ianao; toy ny an’ny voromailala ny masonao.

¹⁶Indro, tsara tarehy koa ianao, ry malalako, eny, mahafinaritra ianao; ahi-maitso no fandrianantsika.

¹⁷Hazo sedera ny sakamandimbin’ny tranontsika, ary hazo kipreso ny valindrihantsika.