Read La Bible en Malgache Tononkiran’i Solomona 2 Bible Online

Tononkiran’i Solomona 2 - La Bible en Malgache bible

Tononkiran’i Solomona 2

¹Izaho dia voahirana eny amin’ny tany lemaka ihany ary lisy eny an-dohasaha.

²Toy ny lisy eo ampovoan’ny tsilo, dia toy izany ianao, Rahavako, eo amin’ny zazavavy.

³Toy ny hazo paoma iray eo anivon’ny hazo any an’ala, dia toy izany ny malalako eo amin’ny zanakalahy. Mahafinaritra ahy indrindra ny mipetraka eo ambanin’ny alokalony, sady mamy ao am-bavako ny voankazony.

⁴Noentiny niditra ho ao an-trano fitoeran-divay aho, ary ny faneva napetrany eo amboniko dia fitiavana.

⁵Hatanjaho amin’ny mofo voaloboka aho, ary velombelomy amin’ny paoma fa mararim-pitia aho.

⁶Aoka ny tanany havia hiondanako, ary aoka ny tanany havanana hamihina ahy.

⁷Mampianiana anareo aho ry zanakavavin’i Jerosalema, amin’ny gazela na amin’ny dieravavy any an-tsaha: Aza manaitra na mamoha ny fitiavana raha tsy efa sitrapony.

⁸Injay, ny feon’ilay malalako! Indro, tamy izy ka mitsambikimbikina eny an-tendrombohitra ary mitsamboamboatra eny amin’ny havoana.

⁹Ny malalako dia tahaka ny gazela na ny diera tanora; indro, mijanona ao alatranonay izy, mitsidika eo am-baravarankely, manarangarana eo amin’ny makarakara.

¹⁰Niteny tamiko ny malalako hoe: Mitsangàna, Rahavako, ry tsara tarehiko, ka andao!

¹¹Fa indro, lasa ny ririnina, tsy misy intsony sady efa lasa ny ranonorana;

¹²mamelana eny amin’ny tany ny voninkazo; tonga ny taona fanaovam-peo fifaliana, ary re atỳ amin’ny tanintsika ny feon’ny domohina.

¹³Mahamanitra ny voany tanora ny aviavy, mamony ny voaloboka ka mamerovero tsara. Mitsangàna, Rahavako, ry tsara tarehiko, ka avia!

¹⁴Ry voromailalako ao an-tsefatsefaky ny harambato, dia ao amin’ny fialokalofana amin’ny fiakarana mideza, aoka hahita ny endrikao sy handre ny feonao aho, fa mamy ny feonao, ary mampaharavoravo ny endrikao.

¹⁵Sambory ny amboahaolo, dia ireo amboahaolo madinika izay manimba ny tanim-boaloboka; fa efa mamony izao ny voalobotsika.

¹⁶Ahy ny malalako, ary azy aho, dia ilay miandry ny ondriny eny amin’ny lisy.

¹⁷Mandra-pangatsiatsiaka ny andro, amin’ny milenti-masoandro, mitodiha, ry ilay malalako, ary aoka ho tahaka ny gazela na ny diera tanora eny an-tendrombohitra be hantsana ianao.