Read La Bible en Malgache Tononkiran’i Solomona 4 Bible Online

Tononkiran’i Solomona 4 - La Bible en Malgache bible

Tononkiran’i Solomona 4

¹Endre, tsara tarehy ianao, Rahavako! Endre, tsara tarehy ianao! Ny masonao dia toy ny an’ny voromailala eo amin’ny fisalobonanao; ny volonao dia tahaka ny andian’osy izay miriotra midina ny tendrombohitr’i Gileada.

²Ny nifinao dia tahaka ny andian’ondrivavy efa voahety izay miakatra avy eo amin’ny fampandroana azy; samy kambana avy ireo ka tsy misy tsy mana-namana.

³Tahaka ny kofehy jaky ny molotrao, ary milantolanto ny fitenenanao; tahaka ny hasin’ampongabendanitra ny takolakao eo amin’ny fisalobonanao;

⁴ny vozonao dia tahaka ny tilikambon’i Davida, natao ho trano fihantonana fitaovam-piadiana; ampinga arivo no voahantona teo, dia ny ampinga rehetra an’ny lehilahy mahery fo.

⁵Ny nononao roa dia toy ny zana-gazela zana-gazela kambana, dia gazela izay miraoka ahitra eny amin’ny lisy.

⁶Mandra-pangatsiatsiaka ny andro, koa amin’ny milenti-masoandro dia handeha ho any amin’ny tendrombohitry ny miora sy ny havoanan’ny ditin-kazo mani-pofona aho.

⁷Tsara avokoa izato bikanao izato, Rahavako; tsy misy kilema ianao.

⁸Avia hiaraka amiko avy any Libanona, ry ampakariko, eny, hiaraka amiko avy any Libanona; mitazàna avy eny an-tampon’i Amana, eny an-tampon’i Senira sy i Hermona, lavaky ny liona, sy ny tendrombohitry ny leoparda.

⁹Babonao ny foko, ry havako ampakariko, babonao ny foko tamin’ny fijerin’ny masonao an’ila fotsiny sy tamin’ny rojo iray amin’ny vozonao.

¹⁰Akory ny hatsaran’ny fitiavanao, ry havako ampakariko! Akory ny hatsaran’ny fitiavanao! Eny, tsara noho ny divay! Ary ny hanitry ny menakao dia mihoatra noho ny balisama rehetra!

¹¹Mitete tantely toy ny avy amin’ny tohotra ny molotrao, ry ampakariko; tantely sy ronono no ao ambanin’ny lelanao, ary ny fofon’ny fitafianao dia tahaka ny fofon’i Libanona.

¹²Saha voafefy tsara ianao ry havako ampakariko, loharano voahidy, fantsakan-drano voaisy tombo-kase.

¹³Ianao no saha anirian’ny ampongabendanitra tsara voa, sady misy voninkazo sy narda,

¹⁴eny, narda sy tamotamo, veromanitra sy havozomanitra ary ny hazo misy ny ditin-kazo mani-pofona rehetra, miora sy hazo manitra mbamin’ny balisama rehetra.

¹⁵Loharano ao an-tsaha ianao, loharano miboiboika, ary renirano kely avy any Libanona.

¹⁶Mifohaza, ry rivotra avy any avaratra; avia, ry avy any atsimo, mitsofa eny an-tsahako hielezan’ny fofon’ny balisama. Aoka ny malalako hankaty an-tanimboliny ka hihinana ny voankazony tsara.