Read La Bible en Malgache Tononkiran’i Solomona 5 Bible Online

Tononkiran’i Solomona 5 - La Bible en Malgache bible

Tononkiran’i Solomona 5

¹Efa tonga eto an-tsahako aho, ry havako ampakariko; mioty ny miorako mbamin’ny balisama aho; efa homana ny toho-tanteliko mbamin’ny tanteliko aho, ary efa misotro ny divaiko mbamin’ny rononoko. Mihinàna ianareo, ry sakaizako, misotroa, eny, mivokisa divay, ry malala.

²Natory aho nefa nahatsiaro ihany ny foko; Injay! Ny feon’ny malalako, izay mandondòna hoe: Vohay aho, ry havako ampakariko, ry voromailalako, ilay ahy tsy misy kilema fa vonton’ando ny lohako; ny voloko milantolanto dia kotsan’ny andon’ny alina.

³Efa niala akanjo aho, koa hataoko ahoana indray no fiakanjo? Efa avy nanasa tongotra aho, koa hataoko ahoana ny handoto azy indray?

⁴Nampiditra ny tanany teo amin’ny lava-kombarika ilay malalako dia nangorakoraka azy ny foko.

⁵Nitsangana hamoha varavarana ny malalako ihany aho ary nitete miora ny tanako, eny, nitete ranon’ny miora ny rantsan-tanako teo amin’ny famohana ny hidim-baravarana.

⁶Namoha varavarana ny malalako aho, kanjo efa nihodina izy ka lasa; very hevitra tamin’ny fitenenany teo am-baravarana aho; nitady azy aho nefa tsy nahita; niantso azy aho nefa tsy novalìny.

⁷Nahita ahy ny mpiambina izay mandehandeha manao andrimaso eny an-tanàna, dia nikapoka sy nandratra ahy; ary nesorin’ireo mpiambina ny manda ny lamba fisaonako.

⁸Mampianiana anareo aho, ry zanakavavin’i Jerosalema: Raha mba hitanareo re ny malalako, dia ahoana no holazainareo aminy? Lazao fa mararim-pitia aho.

⁹Inona ny malalanao mihoatra noho ny malala sasany, ry tsara tarehy amin’ny vehivavy? Inona ny malalanao mihoatra noho ny malala sasany, no dia mampianiana anay toy izao ianao?

¹⁰Ny malalako dia sady fotsy mangatsakatsaka no mena, notsongaina tamin’ny alinalina.

¹¹Ny lohany dia toy ny tena volamena tsy miharo; ny volony dia milantolanto sady mangiloilo toy ny an’ny goaika.

¹²Ny masony dia tahaka ny an’ny voromailala eo anilan’ny sakeli-drano, mandro amin’ny ronono sady tahaka ny vatosoa nalatsaka an-tranontranony.

¹³Ny takolany dia tahaka ny tanim-boninkazo misy zavamanitra eo an-tsaha, tahaka ny tilikambo misy voninkazo manitra. Ny molony dia tahaka ny lisy no sady mitete ranon’ny miora.

¹⁴Ny tanany dia tahaka ny haba volamena voaisy krizolita; ny tenany dia tahaka ny ivoara voalama tsara no sady misarona safira;

¹⁵ny ranjony dia tahaka ny marbra fotsy miorina amin’ny faladia volamena tsy miharo; ny tarehiny dia tahaka an’i Libanona, tsara toy ny sedera.

¹⁶Mamy dia mamy ny vavany, eny, maha te ho tia avokoa ny aminy. Toy izany ny malalako, ary toy izany ny sakaizako, ry zanakavavin’i Jerosalema!