Read La Bible en Malgache Tononkiran’i Solomona 6 Bible Online

Tononkiran’i Solomona 6 - La Bible en Malgache bible

Tononkiran’i Solomona 6

¹Nankaiza ny malalanao, ry tsara tarehy indrindra amin’ny vehivavy? Nivily nankaiza ny malalanao mba hiarahanay aminao hitady azy?

²Lasa nidina ho any an-tsahany ny malalako, dia any amin’ny tanim-boninkazo misy zavamanitra mba hiandry ny ondriny miraoka ahitra eny an-tsaha sy hioty ny lisy.

³An’ny malalako aho, ary ahy ny malalako, dia ilay miandry ny andian’ondriny eny amin’ny lisy.

⁴Tsara tarehy tahaka an’i Tirza ianao, Rahavako, eny, tsara tarehy tahaka an’i Jerosalema, mahatahotra toy ny andia-miaramila mitondra faneva.

⁵Avilio tsy hijery ahy ny masonao fa mampiontanontana ny foko. Ny volonao dia tahaka ny andian’osy izay miriotra midina an’i Gileada.

⁶Ny nifinao dia tahaka ny andian’ondrivavy izay miakatra avy eo amin’ny fampandroana azy; samy kambana avy ireo fa tsy misy tsy mana-namana;

⁷tahaka ny hasin’ampongabendanitra ny takolakao eo amin’ny fisalobonanao.

⁸Misy mpanjakavavy enimpolo sy vady tsindrano valopolo ary zatovovavy tsy hita isa.

⁹Fa tokana kosa ny voromailalako, dia ilay ahy tsy misy kilema, vavitokan’ny reniny sady tsongaina amin’izay naterany. Ny tovovavy izay nahita azy dia nilaza azy ho sambatra, eny, ny mpanjakavavy sy ny vady tsindrano ka nidera azy.

¹⁰Iza moa io vehivavy mitsidika toy ny maraina izay tsara tarehy tahaka ny volana, mamiratra toy ny masoandro nefa sady mahatahotra toy ny andia-miaramila mitondra faneva?

¹¹Lasa nidina nankany an-tsaha misy ny hazo fihinam-boa aho, hijerijery ny zava-maitso eny an-dohasaha, hizaha raha mitsimoka ny voaloboka na mamony ny ampongabendanitra.

¹²Tsy nampoiziko ny nipetrahako teo amin’ny kalesin’ny fireneko be voninahitra.