Read La Bible en Malgache Tononkiran’i Solomona 7 Bible Online

Tononkiran’i Solomona 7 - La Bible en Malgache bible

Tononkiran’i Solomona 7

¹Miverena, miverena, ry Solemita; miverena, miverena, mba hijerenay anao. Inona no hitanareo amin’ny Solemita? Dihy tahaka ny ataon’ny mpandihy roa tonta.

²Endre! Maha te hijery ny famindran’ny tongotrao manao kapa, ry zazavavy, zanaky ny manamboninahitra! Ny manodidina ny andilanao dia tahaka ny firavaka izay nataon’ny tanan’ny mpahay taozavatra.

³Ny foitranao dia tahaka ny kapoaka boribory; tsy ho diso divay noharoharoan-javamanitra anie izy! Ny kibonao dia tahaka ny varimbazaha an-tobiny sady voaravaka lisy manodidina.

⁴Ny nononao roa dia tahaka ny zana-gazela kambana;

⁵ny vozonao dia tahaka ny tilikambo ivoara; ny masonao dia tahaka ny kamory any Hesbona, eo am-bavahadin’i Bata-Rabima; ny oronao dia tahaka ny tilikambo any Libanona izay manandrify an’i Damaskosy.

⁶Ny lohanao dia tahaka an’i Karmela, ary ny volon-dohanao milantolanto dia somary volomparasy. Voatanan’ny volonao olioly ny mpanjaka!

⁷Endre! Tsara tarehy sady mahafinaritra noho izao zava-mahafinaritra rehetra izao ianao ry malala!

⁸Izato tsangananao dia tahaka ny palma, ary ny nononao dia tahaka ny sampahony.

⁹Hoy aho: Hananika ny palma aho ka handray ny rantsany; ary aoka ny nononao ho toy ny sampahom-boaloboka amiko, ary ny fofonainao ho tahaka ny an’ny paoma;

¹⁰ny vavanao dia toy ny divay tsara. Eny, divay mikorotsaka mora ao an-tendan’ny malalako sady miditra misononoka amin’ny molotry ny matory.

¹¹An’ny malalako aho, sady manina ahy izy.

¹²Avia, ry malalako, aoka handeha ho any an-tsaha isika; andeha handry any ambanivohitra isika.

¹³Dia aoka hifoha vao maraina ho any an-tanim-boaloboka isika; aoka hozahantsika raha mitsimoka ny voaloboka, raha mivelatra ny voniny, ary raha mamony ny ampongabendanitra. Any no hanehoako ny fitiavako anao.

¹⁴Mamerovero tsara ny dodaima[1], sady eo am-bavahadintsika dia misy voankazo tsara samihafa, na ny vao na ny ela; efa notahiriziko ho anao ireo, ry malalako.