Read La Bible en Malgache Tononkiran’i Solomona 8 Bible Online

Tononkiran’i Solomona 8 - La Bible en Malgache bible

Tononkiran’i Solomona 8

¹Enga anie ka ho tahaka ny anadahiko izay ninono tamin’Ineny ianao, dia ho nahita anao teny alatrano aho ka ho nanoroka anao, eny, tsy ho azon’olona noesoesoina aho.

²Dia hoentiko ka hampidiriko ho ao an-tranon’Ineny ianao, ary ampianaro aho; hampisotroiko divay noharoharoan-javamanitra mbamin’ny ranon’ampongabendanitro ianao.

³Aoka hanondana ahy ny tanany havia, ary aoka hamihina ahy ny tanany havanana.

⁴Mampianiana anareo aho, ry zanakavavin’i Jerosalema: Aza manaitra na mamoha ny fitiavana raha tsy efa sitrapony.

⁵Iza moa irỳ vehivavy miakatra avy any an-tany efitra, mitehina amin’ny malalany? Teo ambanin’ny hazo paoma no namohazako anao; teo no niterahan’ny reninao anao, eny, teo no nahararian’ilay niteraka anao.

⁶Ataovy toy ny tombo-kase ao am-ponao sy toy ny tombo-kase eo an-tsandrinao aho; fa mahery toy ny fahafatesana ny fitiavana, masiaka tahaka ny fitoeran’ny maty* ny fahasaro-piaro; ny lelafony dia lelafo midedadeda, eny, lelafon’NY TOMPO.

⁷Na dia ny ony maro aza dia tsy afaka hamono ny afon’ny fitiavana, ary na ny renirano aza dia tsy mahapaoka azy; na dia misy olona manome ny fananany rehetra ao an-tranony aza hividianana fitiavana dia hatao tsinontsinona izy.

⁸Manana zandry vavy tsy mbola misy nono izahay; ahoana no hataonay amin’ny zandrinay vavy raha tonga izay andro hangatahan’olona azy ho vady?

⁹Raha rindrimbe izy dia hanangananay tilikambo volafotsy eo an-tampony; fa raha varavarana kosa izy dia hotampenanay hazo fisaka sedera.

¹⁰Rindrimbe aho, ary ny nonoko dia toy ny tilikambo. Raha eo imasony dia toy ny efa mahita fiadanana aho.

¹¹Nanana tanim-boaloboka tao Baala-Hamona i Solomona; nahofany tamin’ny olona mpiandry voly io tanim-boaloboka io ka samy tsy maintsy mitondra sekela volafotsy arivo ho solon’ny vokatra ao ny tsirairay.

¹²Ny tanim-boaloboko, eny, ilay an’ny tenako, dia eto anatrehako, ny arivo kosa dia anao ry Solomona, ary ny roanjato dia ho an’izay mpiandry voly.

¹³Ry mitoetra eny an-tsaha! Te hihaino ny feonao ireo namako; mba ampandreneso izany koa aho.

¹⁴Mandosira, ry malalako, ary aoka ianao mba ho toy ny gazela na ny diera tanora any an-tendrombohitry ny balisama.