Read La Bible en Malgache Isaia 10 Bible Online

Isaia 10 - La Bible en Malgache bible

Isaia 10

¹Lozan’izay mamoaka lalàna mampidi-doza sady mampanoratra didy fampahoriana

²mba hampialany ny mahantra amin’ny fitsarana sy hanalany ny rariny amin’izay ory eo amin’ny oloko, handrobany ny mpitondratena sy hamaboany ny kamboty!

³Inona no hataonareo amin’ny andro famaliana, rehefa ho tonga avy any lavitra ny fandringanana? Ho any amin’iza no handosiranareo hamonjy anareo? Ary aiza no hametrahanareo ny voninahitrareo?

⁴Tsy misy azo atao afa-tsy mihohoka miaraka amin’ny mpifatotra sy mianjera miaraka amin’ny voavono. Kanefa na izany rehetra izany aza dia tsy mbola afaka ihany ny fahatezerany fa mbola miainga ihany ny tanany.

⁵Lozan’i Asiria, tsorakazon’ny fahatezerako! Eny, tehina eny an-tanany ny fahavinirako!

⁶Hamely firenena ratsy fanahy no anirahako azy, ary hamely ny olona izay iharan’ny fahatezerako no andidiako azy, mba hamabo sy handroba ka hanitsakitsaka azy tahaka ny fotaka eny an-dalambe.

⁷Kanjo tsy izany no kasainy, ary tsy izay no heverin’ny fony; fa ny handringana no ao am-pony, hamongotra firenena maro.

⁸Fa hoy izy: Tsy mpanjaka avokoa va ireny governora ambany fahefako ireny?

⁹Tsy tahaka an’i Karkemisy va i Kalno? Tsy tahaka an’i Arpada va i Hamata? Ary tsy tahaka an’i Damaskosy va i Samaria?

¹⁰Tahaka ny nahatraran’ny tanako ny fanjakan’ny andriamanitra tsy izy na dia nihoatra noho ny an’i Jerosalema sy ny an’i Samaria aza ny sarin-javatra voasokitra ao aminy,

¹¹moa tsy tahaka ny nataoko tamin’i Samaria sy ny andriamanitra tsy izy ivavahany va no hataoko amin’i Jerosalema sy ny sampiny koa?

¹²Kanefa rehefa vitan’ny Tompo ny asany rehetra ao amin’ny tendrombohitra Ziona* sy i Jerosalema dia hovaliako kosa ny vokatry ny fiavonavonan’ny fon’ny mpanjakan’i Asiria sy ny fireharehan’ny masony miandranandrana.

¹³Satria hoy izy: Tamin’ny herin’ny tanako no nanaovako izany, tamin’ny fahendreko, satria mahira-tsaina aho; nanaisotra ny faritanin’ny firenena aho sady namabo ny harenany, ary tahaka ny famotraky ny ombilahy no nanonganako ny mpanapaka.

¹⁴Tahaka ny fakàna ny ao amin’ny akanim-borona no nakan’ny tanako ny harenan’ny firenena; ary tahaka ny famory atody nilaozan’ny reniny no namoriako ny any amin’ny tany rehetra: Tsy nisy nikopaka elatra, na nisoka-bava na nikiakiaka.

¹⁵Ny famaky va hirehareha amin’izay mampiasa azy? Ny tsofa va hiavonavona amin’izay manatsofa aminy? Toa ny tsorakazo indray no mampihetsika izay manainga azy, ary ny tehina indray no manandratra izay tsy hazo!

¹⁶Koa izany no handefasan’NY TOMPO, Andriamanitra Tompon’izao rehetra izao, fahiazana amin’ny tremalahiny. Ary ao ambanin’ny voninahiny dia hisy mirehitra toy ny firehitry ny afo.

¹⁷Ho tonga afo ny fahazavan’ny Israely ary ho tonga lelafo ny Iray Masiny ka handoro sy handevona ny tsilony sy ny anjavidiny amin’ny indray andro monja;

¹⁸ary holevoniny tanteraka ny voninahitry ny alany sy ny sahany mahavokatra. Ho tahaka ny fitofezaky ny marary mafy izany.

¹⁹Ho vitsy ny hazo sisa any an’alany ka na zazakely aza dia hahasoratra ny isany.

²⁰Amin’izany andro izany, ny Israely sisa izay tsy ringana amin’ny taranak’i Jakoba, dia tsy hiankina amin’izay namely azy intsony; fa NY TOMPO, Iray Masin’ny Israely, ihany no hiankinany marina tokoa.

²¹Ary izay sisa amin’i Jakoba dia hiverina ho amin’Andriamanitra mahery.

²²Fa na dia tahaka ny fasika any amin’ny ranomasina aza ny isan’ny Israely olonao dia izay sisa aminy ihany no hiverina. Efa tapa-kevitra ny handringana ny Tompo ka hampihatra ny famaliana marina.

²³Eny, tapaka fa haringan’NY TOMPO, Andriamanitra Tompon’izao rehetra izao, ny tany manontolo.

²⁴Koa izao no lazain’NY TOMPO, Andriamanitra Tompon’izao rehetra izao: Ry oloko izay monina any Ziona*, aza matahotra ny Asiriana! Mamely anao amin’ny tsorakazo izy ary manainga ny tehiny aminao tahaka ny fanaon’i Ejipta.

²⁵Nefa kely sisa dia hitsahatra ny fahavinirana, ary handringana azy kosa ny fahatezerana.

²⁶Eny, hamely azy amin’ny karavasy Andriamanitra, Tompon’izao rehetra izao, tahaka ny namelezana ny Midianita teo amin’ny vatolampy Oreba; ary haingainy eny ambonin’ny ranomasina ny tsorakazony, tahaka ny nataony tamin’ny Ejipta.

²⁷Ary amin’izany andro izany dia ho afaka eo an-tsorokao ny entany, ho afaka amin’ny vozonao ny bao fitondrana entany, ho simba ny bao fitondrana entany noho ny fihatavezanao.

²⁸Injao, tonga any Aiata izy, mamakivaky an’i Migrona ary mametraka ny entany ao Mikmasy.

²⁹Mandalo ao an-kadilanana izy. Ao Geba isika no handry! Hoy izy. Mangovitra i Rama, mandositra i Gibean’i Saoly.

³⁰Mikiakiaha mafy, ry Bata-Galima! Mampandria sofina, ry Laisy! Indrisy, ry Anatota mahantra!

³¹Lasa mandositra i Madmena, mitady fierena ny mponina any Gebima.

³²Mbola mijanona any Noba izy anio ary manofahofa ny tanany manambana ny tendrombohitr’i Ziona* zanakavavy, dia ny havoanan’i Jerosalema.

³³Indro, manapaka ny rantsany madinika amin-kery lehibe NY TOMPO, Andriamanitra Tompon’izao rehetra izao: Izay mijoalajoala no voakapa ary izay tena avo no aetry;

³⁴Kapainy amin’ny vy ny ala mikirindro ary i Libanona dia alamaky ny Iray Mahery.