Read La Bible en Malgache Isaia 11 Bible Online

Isaia 11 - La Bible en Malgache bible

Isaia 11

¹Ary hisy Solofo mitsimoka eo amin’ny fototr’i Jese, hisy mitrebona avy eo aminy.

²Hitoetra ao Aminy ny Fanahin’NY TOMPO, dia ny Fanahin’ny fahendrena sy ny fahazavan-tsaina, ny Fanahin’ny fanoloran-tsaina sy ny faherezana, ny Fanahin’ny fahalalana sy ny fahatahorana NY TOMPO.

³Ho hanitra ankasitrahana Aminy ny fahatahorana NY TOMPO ka tsy hitsara araka ny hitan’ny masony Izy, na hampanaiky araka ny ren’ny sofiny.

⁴Fa hotsarainy amin’ny fahamarinana ny madinika ary homeny rariny ny mahantra amin’ny tany; hamely ny tany amin’ny tsorakazon’ny vavany Izy, ary ny fofonain’ny vavany no hamonoany ny ratsy fanahy.

⁵Fahamarinana no ho fisikinany, ary fanahy mahatoky no ho fehikibony.

⁶Hiara-mitoetra amin’ny amboadia ny zanak’ondry, hiara-mandry amin’ny zanak’osy ny leoparda; hiray toerana ny zanak’omby sy ny liona tanora ary ny omby mifahy ka zazalahy kely no hitari-dalana azy.

⁷Hiara-komana ny ombivavy sy ny bera, hiara-mandry ny zanany, ary hihina-mololo tahaka ny omby ny liona.

⁸Hilalao eo amin’ny lavaky ny menarana ny zaza minono ary hanatsotra ny tanany ao amin’ny lavaky ny bibilava ny zaza mitsaha-nono.

⁹Tsy hisy handratra, ary tsy hisy hanimba manerana ny tendrombohitro masina; fa ho henika ny fahalalana NY TOMPO ny tany, tahaka ny anaronan’ny rano ny ranomasina.

¹⁰Amin’izany andro izany, ny Solofon’i Jese, izay hijoro toy ny faneva ho an’ny firenena hafa, dia hotadiavin’ny Jentilisa*, ary ho feno voninahitra ny toeram-pitsaharany.

¹¹Amin’izany andro izany dia mbola hanatsotra ny tanany fanindroany ny Tompo mba hanavotra ny olony, izay mbola sisa, avy any Asiria sy Ejipta, Patrosa sy Kosy, Elama, Sinara sy Hamata ary ny avy any amin’ny nosy an-dranomasina.

¹²Dia hanangana faneva ho an’ny Jentilisa Izy ka hamory ny Israely izay voaroaka sy hanangona ny Joda izay voaely avy any amin’ny vazan-tany efatra.

¹³Hitsahatra ny fialonan’i Efraima ary hofongorana ny mpandrafy an’i Joda; tsy hialona an’i Joda intsony i Efraima ary tsy handrafy an’i Efraima intsony i Joda.

¹⁴Fa hipaoka ny havoanan’ny Filistina any andrefana ireo sady hiara-mamabo ny zanaky ny Atsinanana; amin’i Edoma sy Moaba no hanaingany ny tanany ary hanoa azy ny taranak’i Amona.

¹⁵Hataon’NY TOMPO ho zavatra voaozona ny sakeli-dranomasin’i Ejipta, hanainga ny tanany amin’ny ony Eofrata Izy ka hamely azy amin’ny rivony mahamay; hokapohiny io dia hanjary sakeli-drano fito ary ho tafita amin’izany ny olona tsy miala kapa.

¹⁶Hisy lalana voavoatra halehan’ny olony sisa, izay ho sisa avy any Asiria, toy ny ho an’ny Israely tamin’ny andro niakarany avy tany amin’ny tany Ejipta.