Read La Bible en Malgache Isaia 13 Bible Online

Isaia 13 - La Bible en Malgache bible

Isaia 13

¹Ny loza hanjo an’i Babilona araka ny fahitan’Isaia zanak’i Amoza.

²Manangàna faneva eo an-tampon’izay tendrombohitra mangadihady ianareo, manandrata feo hiantso azy, hofahofay tanana izy mba hiditra amin’ny vavahadin’ireo olo-manankaja!

³Efa nandidy ireo nohamasiniko Aho sady niantso ny lehilahy mahery fo; dia ireo mibitaka sy mirehareha mba hahatanteraka ny fahatezerako.

⁴Injany ny horakoraka any an-tendrombohitra! Tahaka ny an’ny vahoaka marobe! Ny tabataba ataon’ireo fanjakana, ireo firenena maro tafatambatra! Andriamanitra, Tompon’izao rehetra izao, no misafo tafika hiady.

⁵Avy any amin’ny tany lavitra izy ireo, avy any amin’ny faravodilanitra; NY TOMPO sy ireo fitaovam-piadian’ny fahatezerany no avy handrava ny tany rehetra.

⁶Midradradradrà ianareo fa antomotra ny Andron’NY TOMPO; tahaka ny fandravan’ny Tsitoha no fiaviny.

⁷Noho izany dia hiraviravy ny tanana rehetra, ary ho kivy ny fon’ny olona rehetra;

⁸Ho toran-kovitra izy; fanaintainana sy fahoriana no hahazo azy; hijalijaly tahaka ny vehivavy mihetsi-jaza izy; samy ho talanjona izy ka hifampijery; toy ny nodorana afo ny tarehiny.

⁹Indro, avy ny Andron’NY TOMPO; andron’ny loza sy fahavinirana ary firehetan’ny fahatezerana mba hanafoanana ny tany sy handringanana ny mpanota tsy ho ao.

¹⁰Fa ny kintan’ny lanitra sy ireo Telonohorefy aza dia tsy hampamirapiratra ny fahazavany intsony, ny masoandro dia ho maizina amin’ny fiposahany ary ny volana dia tsy hangarangarana.

¹¹Hatsingeriko amin’izao tontolo izao ny faharatsiany, ary amin’ny ratsy fanahy ny helony; hatsahatro ny fireharehan’ny mpiavonavona ary haetriko ny fiavonavonan’ny mpampihorohoro.

¹²Hataoko ho saro-tadiavina mihoatra noho ny tena volamena tsy miharo ny olombelona; eny, mihoatra noho ny volamena tsy miharo avy any Ofira aza.

¹³Noho izany dia hampihorohoroiko ny lanitra, ary hihovotrovotra any amin’ny fanorenany ny tany, noho ny fahatezeran’Andriamanitra, Tompon’izao rehetra izao, sy noho ny andro firehetan’ny fahatezerany.

¹⁴Dia ho tahaka ny gazela hazaina ny olona, ary ho tahaka ny ondry aman’osy tsy misy mpamory ka samy ho lasa any amin’ny fireneny avy izy; eny, samy handositra ho any amin’ny taniny avy izy;

¹⁵holefonina izay rehetra azo ary ho lavon’ny sabatra izay rehetra tratra.

¹⁶Hotorotoroina eo imasony ny zanany madinika; hobaboina ny tranony ary hisy hanolana ny vadiny.

¹⁷Indro, hampirisihiko hamely azy ny Mediana izay tsy miraharaha ny volafotsy sady tsy mankamamy ny volamena.

¹⁸Handripaka ny zatovo ny tsipìkany ary tsy hamindrany fo izay ateraky ny kibo; eny, tsy hiantran’ny masony na dia ny zaza aza.

¹⁹I Babilona izay ravaky ny fanjakana maro, tabiha sy reharehan’ny Kaldeana, dia ho rava tahaka ny nandravan’Andriamanitra an’i Sodoma sy i Gomora;

²⁰Tsy honenana intsony izy, ary tsy hitoerana intsony hatramin’ny taranaka fara aman-dimby. Tsy hisy mpifindrafindra monina hanorin-day ao, na mpiandry ondry hampandry ny ondriny;

²¹fa ny biby any an-tany efitra no hitoetra ao, ho feno vorondolo ny tranony; ny aotirisy no hitoetra any ary ny osilahy no hitsambikimbikina any.

²²Ny kary no hifampierona ao an-tranobeny ary ny amboadia no ho ao amin’ny lapa mirentirenty. Efa antomotra ny fotoanany ary tsy hatao ela intsony ny androny.