Read La Bible en Malgache Isaia 14 Bible Online

Isaia 14 - La Bible en Malgache bible

Isaia 14

¹Fa NY TOMPO hamindra fo amin’i Jakoba ary mbola hifidy ny Israely indray ka hamponina azy ao amin’ny taniny; hikambana aminy ny vahiny ary hiombona amin’ny taranak’i Jakoba izy.

²Hisy olona maro haka azy ka hanatitra azy hody, ary ny taranak’Israely dia hanana azy ho mpanompolahy sy mpanompovavy ao amin’ny tanin’NY TOMPO. Ho tonga mpamabo ireo izay namabo azy izy, ary hampanompo izay nampahory azy.

³Koa amin’ny andro hanomezan’NY TOMPO fitsaharana anao ho afaka amin’ny fahorianao sy ny fitebitebin’ny fonao ary ny fanompoana mafy izay nampanompoana anao

⁴dia hambaranao izao oha-teny ny amin’ny mpanjakan’i Babilona izao hoe: Akory izay! Nitsahatra ilay mpampahory! Tsy ao intsony ilay mpampijaly!

⁵NY TOMPO efa nanapatapaka ny tehin’ny ratsy fanahy, dia ny tehim-pahefan’ny mpanapaka

⁶izay namely firenena tamin-katezerana, tamin’ny kapoka tsy nanam-pitsaharana sady nampanompo firenena tamin’ny fahavinirana, tamin’ny fanenjehana tsy misy antra.

⁷Miadana ka mandry fehizay ny tany manontolo; velominy ao ny hoby.

⁸Eny, ny hazo kipreso sy ny sedera any Libanona dia hifaly ny aminao hoe: Hatrizay nahalavo anao izay dia tsy misy mpikapa hazo miakatra atỳ aminay intsony.

⁹Mihetsiketsika ny fitoeran’ny maty* any ambany mba hitsena anao amin’ny fiavianao; mamoha ny matoatoa hitsena anao izy, dia ireny osilahy mpitarika[5] rehetra teo ambonin’ny tany ireny; atsangany hiala amin’ny sezafiandrianany ny mpanjakan’ny firenena rehetra.

¹⁰Dia samy hiteny aminao izy rehetra hoe: Hay ianao koa mba osa tahaka anay, efa tonga tahaka anay ianao!

¹¹Navarina ho atỳ amin’ny fitoeran’ny maty ny tabiha sy reharehanao mbamin’ny feon’ny valihanao; kankana no ilafihanao, ary olitra no mandrakotra anao.

¹²Endre! Nilatsaka avy tany an-danitra ianao, ry kintana fitarikandro, zanaky ny maraina! Voakapa hianjera amin’ny tany ianao, ry ilay mpampanaiky firenena!

¹³Niteny anakampo ianao hoe: Hiakatra any an-danitra aho, ary hasandratro ho ambonin’ny kintan’Andriamanitra ny sezafiandrianako; dia hipetraka eo amin’ny tendrombohitra Fihaonana any amin’ny farany avaratra aho;

¹⁴hiakatra ho any ambonin’ny rahona aho ka ho tahaka ny Avo Indrindra.

¹⁵Kanjo hampidinina hatrany amin’ny fitoeran’ny maty ianao, ho any am-parany lalina amin’ny lavaka mangitsokitsoka.

¹⁶Hibanjina anao izay mahita anao ka hihevitra anao hoe: Moa ity va ilay lehilahy nampihorohoro ny tany sy nampihozongozona ny fanjakana

¹⁷ary nanao izao tontolo izao ho tany efitra sy nandrava ny tanànany ary tsy nandefa ny mpifatotra hody?

¹⁸Ny mpanjakan’ny firenena rehetra dia samy mandry amin’ny voninahitra avokoa, samy ao am-pasany avy.

¹⁹Fa ianao kosa dia nariana niala lavitra ny fasanao, tahaka ny solofon-kazo ratsy izay ariana, sady voatsindrin’ny fatin’ny voavono, dia ireo voatrabaky ny sabatra ka nampidinina ho ao amin’ny vato ao an-davaka, tahaka ny faty hitsakitsahin’ny tongotra.

²⁰Tsy halevina miaraka amin’ireny ianao satria efa nanimba ny taninao sady efa namono ny olonao; tsy hotononina mandrakizay ny taranaky ny mpanao ratsy!

²¹Omàny ny famonoana hamelezana ny zanany noho ny heloky ny razany! Aoka izy tsy hitsangana haka ny tany indray ka hanorina tanàna manerana an’izao tontolo izao.

²²Fa hitsangana hamely azy Aho, hoy Andriamanitra, Tompon’izao rehetra izao. Hofoanako ny anaran’i Babilona sy izay sisa ao mbamin’ny zanany sy ny taranany, hoy NY TOMPO.

²³Hataoko fonenan’ny sokina sy ho honahona izy ary hofafako amin’ny kifafa fandringanana, hoy Andriamanitra, Tompon’izao rehetra izao.

²⁴Nianiana Andriamanitra, Tompon’izao rehetra izao, hoe: Araka izay noheveriko no hatao aminy ary araka izay nokasaiko no hotovina aminy:

²⁵Hanorotoro ny Asiriana ao amin’ny taniko Aho ary hanitsakitsaka azy eny amin’ny tendrombohitro; ny ziogany dia hesorina amin’ireo ary ny entany dia ho afaka amin’ny sorony.

²⁶Izany no fikasana ny amin’ny tany rehetra ary izany no tanana miainga hamely ny firenena rehetra.

²⁷Andriamanitra, Tompon’izao rehetra izao, no efa nikasa, koa iza indray no hahafoana izany? Miainga ny tanany ka iza no hampihemotra izany?

²⁸Tamin’ny taona nahafatesan’i Ahaza mpanjaka no nisy izao faminaniana ny loza hanjo izao:

²⁹Aza mifaly, ry tanin’ny Filistina manontolo, satria hoe tapaka ny tsorakazo namely anao! Fa avy ao an-kibon’ny bibilava no hiavian’ny menarana, ary ny aterany dia ho tonga dragona* manidina.

³⁰Dia mba hihinana ny fadiranovana indrindra, ary handry fehizay ny mahantra; fa hataoko maty mosary kosa izay sisa tavela aminao; eny, hovonoina ho faty izay tavela aminao.

³¹Midradradradrà, ry vavahady*! Mitolokoa, ry tanàna! Aoka ho ketraka ianao ry tanin’ny Filistina manontolo! Fa misy setroka mitranga avy any avaratra ary tsy misy miala amin’ny laharany akory ny miaramilany.

³²Inona moa no havaly ny irak’io firenena io? Izao: NY TOMPO efa nanorina an’i Ziona*, ary ao no hialofan’izay olony ory.