Read La Bible en Malgache Isaia 15 Bible Online

Isaia 15 - La Bible en Malgache bible

Isaia 15

¹Ny loza hanjo an’i Moaba. Indray alina no nandravana azy! Fongotra i Ara-Moaba. Eny, indray alina no nandravana azy! Fongotra i Kira-Moaba.

²Miakatra ho ao Baita sy ho ao Dibona ny olona, ao amin’ny toerana fanaovana sorona, mba hitomany; i Moaba dia midradradradra any amin’i Nebo sy i Medeba; nokakasana ny loha rehetra; voaharatra ny somotra rehetra.

³Eny an-dalambe dia misikina lamba fisaonana ny olona; eny an-tampon-tranony* sy eny an-kalalahana dia midradradradra avokoa izy ireo sady mijoy ny ranomasony.

⁴Mitoreo i Hesbona sy i Elale ka re hatrany Jahaza ny feony; noho izany dia miantso mafy ny miaramilan’i Moaba, mihorohoro izy ireo.

⁵Mitoloko ny foko noho ny amin’i Moaba; tonga hatrany Zoara sy Eglata-Selisia ny olona mandositra avy ao. Fa miakatra am-pitomaniana ao amin’ny fiakarana Lohita izy, sady midradradradra amim-pamoizam-po eny an-dalana mankany Horonaima;

⁶fa ny ranon’i Nimrima dia tonga karankaina; maina ny ahitra, malazo ny zavamaniry ka tsy misy zava-maitso intsony.

⁷Noho izany dia entiny ho any ampitan’ny lohasahan-driakan’ny hazomalahelo ny harena be izay nohariny sy ny entany izay mbola voatahiriny.

⁸Fa manerana ny faritanin’i Moaba ny tolokony; re hatrany Eglaima ny fidradradradrany; eny, re hatrany Bera-Elima ny toreony.

⁹Feno ra ny ranon’i Dimona; eny, mbola hampiako ny loza manjo an’i Dimona: Hisy liona handrapaka izay afa-mandositra avy any Moaba, sy handany izay sisa amin’ny tany.