Read La Bible en Malgache Isaia 16 Bible Online

Isaia 16 - La Bible en Malgache bible

Isaia 16

¹Anatero zanak’ondry ny mpanapaka amin’ny tany, hatreo Sela ka manerana ny tany efitra hatrany amin’ny tendrombohitr’i Ziona* zanakavavy.

²Tahaka ny vorona notairina niala tamin’ny akaniny ka mirenireny foana, ho toy izany ny zanakavavin’i Moaba ao amin’ny fitàna any Arnona.

³Manolora saina, mandraisa fanapahan-kevitra, ataovy tahaka ny alina ny alokao, na dia amin’ny andro mitataovovonana aza; afeno izay voaroaka ary aza aseho izay mandositra!

⁴Aoka hitoetra ao aminao izay oloko voaroaka, ry Moaba! Aoka ho fiereny ianao mba tsy ho azon’ny mpandringana azy izy! Fa tsy misy intsony ny mpampahory; tapitra ny loza, tsy misy amin’ny tany intsony ny mpanosihosy.

⁵Ary hisy sezafiandrianana hampitoerina amin’ny famindrampo. Hisy hipetraka amin’ny fahamarinana eo aminy ao an-dain’i Davida, ary hitsara sy handinika izay marina izy sady ho haingam-pamoaka fitsarana marina.

⁶Efa renay ny fiavonavonan’i Moaba; fatra-piavonavona loatra izy, mirehareha sy miavonavona, manao vava tafahoatra ary miteniteny foana.

⁷Noho izany dia hidradradradra amin’i Moaba i Moaba; eny, samy hidradradradra avokoa izy rehetra; hitomany ny faharavan’i Kira-Hareseta ianareo ka ho ory indrindra.

⁸Fa malazo ny sahan’i Hesbona; norantsanan’ny andrianan’ny firenena ny voalobok’i Sibma izay tonga hatrany Jazera sy nisandrahaka tany an-tany efitra; nandadilady ny sampany ka tafita ny ranomasina.

⁹Koa izany no hitomaniako ny voalobok’i Sibma, toy ny fitomanian’i Jazera, handena anao amin’ny ranomasoko aho, ry Hesbona sy Elale, satria eo amin’ny vokatrao lohataona sy ny fararanonao dia tsy misy ny horakoraka fanao raha mioty voaloboka.

¹⁰Tsy ahitana ny hafaliana sy ny haravoravoana any amin’ny sahan-kazo fihinam-boa; tsy misy hoby na horakoraka ao amin’ny tanim-boaloboka! Tsy hanosihosy divay ao amin’ny famiazana intsony ny mpanosihosy; efa natsahatro ny horakoraka fanao raha mioty voaloboka.

¹¹Noho izany dia mitaraina manao feon-dokanga ny ato anatiko noho ny amin’i Moaba ary malahelo ny foko noho ny amin’i Kira-Haresa.

¹²Miseho i Moaba, sasatra ao amin’ny toerana fanaovana sorona izy. Mankao amin’ny fitoerany masina izy mba hivavaka nefa tsy mahazo na inona na inona.

¹³Izany no tenin’NY TOMPO nataony fahiny ny amin’i Moaba.

¹⁴Ankehitriny kosa dia hoy NY TOMPO hoe: Raha afaka telo taona, tahaka ny taonan’ny mpikarama, dia ho tsinontsinona ny voninahitr’i Moaba. Na dia betsaka aza ny vahoakany dia ho vitsy sisa; eny, ho vitsy foana ka tsy misy lanjany.