Read La Bible en Malgache Isaia 19 Bible Online

Isaia 19 - La Bible en Malgache bible

Isaia 19

¹Ny amin’ny loza hanjo an’i Ejipta: Indro NY TOMPO mitaingina rahona miriotra mafy ka tonga any Ejipta. Mangorohoro eo anatrehany ny andriamanitra tsy izy any Ejipta, ary ketraka ny fon’i Ejipta.

²Hampirisihiko hiady izy samy Ejiptiana: Samy hiady amin’ny rahalahiny sy amin’ny namany avy izy; ny tanàna dia hiady amin’ny tanàna ary ny fanjakana dia hiady amin’ny fanjakana.

³Ho very hevitra ny Ejiptiana; eny, hofoanako ny fikasany; hila saina amin’ny andriamanitra tsy izy sy amin’ny mpiantso ny fanahin’ny maty ary amin’ny mpanandro izy.

⁴Hatolotro hogiazana amin’izay fitondrana mafy i Ejipta ary mpanjaka masiaka no hanjaka aminy, hoy NY TOMPO, Andriamanitra Tompon’izao rehetra izao.

⁵Ho tankina ny rano amin’ny ranomasina, ho ritra ny ony ka ho maina;

⁶ho maimbo ny sampantsampan’ny ony; hihena ny lakandranon’i Ejipta ka ho maina; halazo ny volotara sy ny zozoro;

⁷ho ngazana ny moron’i Neily sy ny vavaranon’i Neily, ho maina izay nafafy teny amoron’i Neily ka tsy ho eny intsony fa hopaohin’ny rivotra.

⁸Dia hitoloko ny mpaka hazandrano ary hisaona ny mpamintana rehetra ao Neily; ho reraka ny mpamelatra harato amin’ny rano.

⁹Ho menatra izay mandraotra tahon-drongony, dia ny mpandraotra sy ny mpanenona lamba fotsy.

¹⁰Ho torotoro ny andrin’ny tany ary halahelo ny mpikarama rehetra.

¹¹Tena adala mihitsy ny mpanapaka any Zoana; hevi-poana no avoakan’ireo izay hendry indrindra amin’ny mpanolotsainan’i Farao. Ahoana no ilazanareo amin’i Farao hoe: Zanak’olon-kendry aho sady taranak’ireo mpanjaka tamin’ny fahagola?

¹²Aiza ary ireo olon-kendrinao ireo? Aoka hanambara aminao izy ary aoka ho fantany izay nokasain’NY TOMPO, Andriamanitra Tompon’izao rehetra izao, hatao amin’i Ejipta!

¹³Adala ny mpanapaka any Zoana, voafitaka ny mpanapaka any Nofa, ary nampivembena an’i Ejipta ireo fehizoron’ny fireneny;

¹⁴NY TOMPO efa nandrotsaka fanahy mampandraingiraingy tao Ejipta ka nampivembena azy tamin’ny asany rehetra nataony, tahaka ny olona mamo mivembena sady mandoa.

¹⁵Tsy misy manao na inona na inona intsony ny Ejiptiana, na ny loha na ny rambo, na ny palma na ny zozoro.

¹⁶Amin’izany andro izany dia ho tahaka ny vehivavy i Ejipta ka ho toran-kovitra sy ho raiki-tahotra noho ny fanaingan’Andriamanitra, Tompon’izao rehetra izao, ny tanany, izay aingainy hamelezany azy.

¹⁷Ary ho tahotr’i Ejipta ny tanin’i Joda, koa na oviana na oviana no misy miresaka izany aminy dia ho raiki-tahotra izy noho ny fikasan’Andriamanitra, Tompon’izao rehetra izao, hamelezana azy.

¹⁸Amin’izany andro izany dia hisy tanàna dimy amin’ny tany Ejipta samy hiteny ny fitenin’i Kanana sy hianiana fa ho an’Andriamanitra, Tompon’izao rehetra izao; ny iray amin’ireny dia hatao hoe Ira-Haresa[6].

¹⁹Amin’izany andro izany dia hisy alitara ho an’NY TOMPO eo amin’ny tany Ejipta ary tsangambato ho Azy eo amin’ny sisintaniny.

²⁰Ho famantarana sy vavolombelona ho an’Andriamanitra, Tompon’izao rehetra izao ao amin’ny tany Ejipta ireo; raha mitaraina amin’NY TOMPO noho ny mpampahory izy dia haniraka mpamonjy sy mpiaro ho ao aminy Izy ka hamonjy azy.

²¹Hanao izay hahafantaran’ny Ejiptiana Azy NY TOMPO, ary hahalala NY TOMPO kosa ny Ejiptiana amin’izany andro izany; dia hanompo Azy amin’ny fanatitra alatsa-dra sy amin’ny fanatitra avy amin’ny zavamaniry izy ka hivoady amin’NY TOMPO sady hanefa ny voadiny.

²²Eny, raha mamely ny Ejiptiana NY TOMPO dia sady hamely Izy no hanasitrana; dia hiverina ho any amin’NY TOMPO ireo ka hekeny ny fangatahany ary hositraniny izy.

²³Amin’izany andro izany dia hisy lalambe avy any Ejipta mankany Asiria, koa ny Asiriana dia hankany Ejipta, ary ny Ejiptiana kosa dia hankany Asiria, ary hiara-manompo ny Ejiptiana sy ny Asiriana.

²⁴Amin’izany andro izany dia ho fahatelo aorianan’i Ejipta sy Asiria ny Israely, ho fitahiana eo amin’ny tany;

²⁵satria hotahin’Andriamanitra, Tompon’izao rehetra izao, ireo ka hataony hoe: Hotahina anie Ejipta oloko, sy Asiria asan’ny tanako, ary Israely lovako!