Read La Bible en Malgache Isaia 2 Bible Online

Isaia 2 - La Bible en Malgache bible

Isaia 2

¹Ny tenin’Isaia, zanak’i Amoza, ny amin’izay hitany momba ny Joda sy i Jerosalema.

²Izao no ho tonga any am-parany: Ny tendrombohitra misy ny tranon’NY TOMPO dia ho tafaorina eo an-tampon’ny tendrombohitra, ary hasandratra ho avo noho ny havoana, ary ny firenena rehetra no hitanjozotra hankany.

³Eny, olona marobe no hiainga ka hiteny hoe: Andeha isika hiakatra any amin’ny tendrombohitry NY TOMPO, any amin’ny tranon’Andriamanitr’i Jakoba! Mba hampianarany antsika ny amin’ny lalany, sy handehanantsika amin’izay tokony haleha. Fa avy any Ziona* no hivoahan’ny lalàna, ary avy any Jerosalema ny tenin’NY TOMPO.

⁴Ho mpitsara ny firenena Izy ka ho mpanelanelana amin’ny firenena maro. Dia hanefy ny sabany ho angady ireny, ary ny lefony ho hetim-boaloboka; ny firenena dia tsy hanainga sabatra hamely firenena hafa na hianatra ady intsony.

⁵Ry taranak’i Jakoba, avia, ary aoka isika handeha amin’ny fahazavan’NY TOMPO!

⁶Fa efa nanary ny taranak’i Jakoba olonao Ianao satria feno ny fanaon’ny avy any atsinanana izay mpanandro tahaka ny Filistina izy sady nanao fanekena tamin’ny zana-bahiny;

⁷feno volafotsy sy volamena ny taniny, tsy hita lany ny harenany, feno soavaly ny taniny ary tsy hita isa ny kalesy fitondrany miady.

⁸Feno andriamanitra tsy izy ny taniny; eo anatrehan’ny asan’ny tanany no iankohofany, dia eo anoloan’izay nataon’ny rantsantanany;

⁹Koa hatao mitanondrika ny zanak’olombelona ary haetry ny olona; nefa aza mamela ny helony Ianao!

¹⁰Midira ao amin’ny vatolampy ary miere ao amin’ny vovoka noho ny tahotra NY TOMPO sy ny voninahitry ny fahalehibiazany.

¹¹Ny fiandranandran’ny mason’ny zanak’olombelona dia haetry ary ny fiavonavonan’ny olona dia hatao mitanondrika; fa NY TOMPO ihany no hisandratra amin’izany andro izany.

¹²Satria misy Andron’Andriamanitra, Tompon’izao rehetra izao, hitsarana izay mpiavonavona sy mpirehareha rehetra mbamin’izay misandratra rehetra ka hanetrena ireny,

¹³dia ny sedera rehetra any Libanona izay avo sady manerinerina, ny hazo oaka rehetra any Basana,

¹⁴ny tendrombohitra avo rehetra, ny havoana manerinerina,

¹⁵ny tilikambo fiambenana miringiringy rehetra, ny manda mafy rehetra,

¹⁶ny sambon’i Tarsisy rehetra ary ny taozavatra tsara tarehy rehetra.

¹⁷Hatao mitanondrika ny fireharehan’ny zanak’olombelona, ary ny fiavonavonan’ny olona dia haetry; Fa NY TOMPO ihany no hisandratra amin’izany andro izany.

¹⁸Ny andriamanitra tsy izy dia ho foana avokoa.

¹⁹Hiditra any amin’ny zohy ao amin’ny lavabato sy any amin’ny lavaka feno vovoka ny olona noho ny tahotra NY TOMPO sy ny voninahitry ny fahalehibiazany, rehefa mitsangana hampihorohoro ny tany Izy.

²⁰Amin’izany andro izany dia harian’ny olona ho an’ny voalavo sy ny ramanavy ny andriamanitra volafotsiny sy ny andriamanitra volamenany izay nataony hiankohofany eo anatrehany;

²¹hiditra amin’ny triatra amin’ny vatolampy sy any an-tsefatsefaky ny harambato izy, noho ny tahotra NY TOMPO sy ny voninahitry ny fahalehibiazany, rehefa mitsangana hampihorohoro ny tany Izy.

²²Mitsahara fa aza mitoky amin’ny olombelona, fofonaina ihany no eo am-bavorony, koa zinona moa izy?