Read La Bible en Malgache Isaia 21 Bible Online

Isaia 21 - La Bible en Malgache bible

Isaia 21

¹Ny amin’ny loza hanjo ny tany efitra amoron’ny ranomasina[7]. Tahaka ny firimorimon’ny tadio any Negeva no fiaviny avy any an-tany efitra, avy any amin’ny tany mahatahotra.

²Misy fahitana mampahory aseho amiko: Mamitaka ny mpamitaka ary mandringana ny mpandringana. Iakaro, ry Elama ô! Ataovy fahirano, ry Media ô! Hatsahatro ny fisentoana rehetra.

³Ary raha nahita izany aho dia feno fanaintainana ny andilako; fijalijaliana no nahazo ahy tahaka ny fijalijalian’ny vehivavy raha miteraka; niolanolana fatratra aho ka tsy nandre; toran-kovitra aho ka tsy nahita.

⁴Niemponempona ny foko, horohoro no nahazo ahy; navadiny ho fangovitana ny hariva niriko ho avy.

⁵Velarina ny latabatra, miambina ny mpiambina, mihinana sy misotro ny olona. Mitsangàna ianareo lehibe! Hosory diloilo ny ampinga!

⁶Fa izao no nolazain’NY TOMPO tamiko: Mandehana, manendre mpitily, koa izay hitany no aoka holazainy.

⁷Dia nahita izy ka indreo kalesy fitondra miady, soavaly mandeha tsiroaroa sy boriky betsaka ary rameva betsaka; dia nihaino izy; eny, nihaino tsara;

⁸Dia niantso mafy nanao feon-diona izy hoe: Tompo ô! Mijanona mandrakariva eto ambonin’ny fitazanako aho amin’ny antoandro, ary mitoetra eto amin’ny fiambenako aho mandritra ny alina.

⁹Koa indro, avy ny kalesy fitondra miady miaraka amin’olona; soavaly mandeha tsiroaroa! Ary hoy izy hoe: Rava, rava i Babilona! Ary ny sarivongan’ny andriamaniny rehetra dia voatorotoro miraraka amin’ny tany!

¹⁰Ianareo izay voavely toy ny vary teo am-pamoloako! Izay efa reko tamin’Andriamanitra, Tompon’izao rehetra izao, Andriamanitry ny Israely, no nambarako taminareo.

¹¹Ny amin’ny loza hanjo an’i Edoma. Misy miantsoantso ahy any Seìra hoe: Ry mpiambina ô, toy inona alina moa izao? Ry mpiambina ô, toy inona alina moa izao?

¹²Dia hoy ny mpiambina: Avy ny maraina, avy koa ny alina. Raha mbola ta hanontany ianareo dia manontania ihany! Dia miverena indray; eny, miverena!

¹³Ny loza hanjo an’i Arabia. Any anaty kirihitrala any Arabia no handrianareo, ry andian’ny Dedanita!

¹⁴Itondray rano ny mangetaheta; itondray mofo mitsena ireo olona mandositra, ry mponina amin’ny tany Tema.

¹⁵Fa mandositra ny sabatra ireo, dia ny sabatra voatsoaka sy ny tsipìka voahenjana ary ny havesatry ny ady.

¹⁶Fa izao no nolazain’NY TOMPO tamiko: Ato anatin’ny herintaona, tahaka ny taonan’ny mpikarama, dia ho levona avokoa ny voninahitr’i Kedara.

¹⁷Ho vitsy foana sisa ny tsipìka izay an’ny lehilahy mahery, taranak’i Kedara; fa NY TOMPO, Andriamanitry ny Israely, no efa niteny.