Read La Bible en Malgache Isaia 23 Bible Online

Isaia 23 - La Bible en Malgache bible

Isaia 23

¹Ny loza hanjo an’i Tiro. Midradradradrà ianareo, ry sambon’i Tarsisy ô! Fa rava izy! Tsy misy trano intsony! Tsy misy fidirana intsony! Avy tany amin’ny tany Kitima no nanambaràna izany taminy.

²Mangìna ianareo mponina amin’ny nosy izay efa nofenoin’ny mpivaro-mandeha avy any Sidona harena tamin’ny fitetezany ranomasina!

³Teny amin’ny ranobe ny varin’i Sihora, dia ny vokatr’i Neily ka nampiditra harena ho azy izy; ary tonga tsenan’ny firenena izy.

⁴Aoka ho menatra ianao, ry Sidona! Fa hoy ny ranomasina, dia ny fiarovana mafy ao an-dranomasina hoe: Tsy nihetsi-jaza aho, tsy niteraka aho, tsy nitaiza zatovo aho na namelona virijiny.

⁵Rehefa re tany Ejipta izany dia toran-kovitra izy noho ny nanjo an’i Tiro.

⁶Mità ho any Tarsisy ianareo; Midradradradrà, ry mponina any amoron-tsiraka.

⁷Ity va ilay tanànanareo niravoravo? Hatry ny fahagola no efa niorenany sady noentin’ny tongony hivahiny lavitra izy.

⁸Iza no nikasa izany mba hamelezana an’i Tiro, ilay mpanome satroboninahitra, nefa ny mpivaro-mandeha tao aminy dia mpanapaka, ary olona fanta-daza ny mpivarotra ao aminy.

⁹Andriamanitra, Tompon’izao rehetra izao, no nikasa izany, mba hampietreny ny fiavonavonany noho ny hatsaran-tarehy rehetra, sy hanalany ny voninahitr’izay rehetra ankalazaina amin’ny tany.

¹⁰Aoka hiely manerana ny taninao tahaka an’i Neily ianao, ry Tarsisy zanakavavy, fa tsy misy intsony ny zioga!

¹¹Natsotrany teo ambonin’ny ranomasina ny tanan’NY TOMPO; nampihorohoroiny ny fanjakana; NY TOMPO efa nandidy ny amin’i Kanana mba handravana ireo mandany mafy orina.

¹²Hoy Izy: Tsy hiravoravo intsony ianao, ry Sidona zanakavavy, virijiny afa-baraka! Miaingà ianao ka mità ho any Kitima! Kanefa na dia any aza dia tsy hahita fitsaharana akory ianao.

¹³Indro ny tanin’ny Kaldeana, izay tsy firenena akory fahiny; fa ny Asiriana no nanorina azy ho an’ny mponina any an-tany efitra; manangana tilikambo fiambenana izy ary mandrava ny lapan’ny mpanjaka ao ka mampody azy ho korontam-bato.

¹⁴Midradradradrà ianareo, ry sambon’i Tarsisy ô! Fa rava ny mandanareo!

¹⁵Amin’izany andro izany dia hohadinoina mandritra ny fitopolo taona i Tiro, toy ny andron’ny mpanjaka iray. Rehefa afaka fitopolo taona dia hiharan’ilay tononkalo momba ny vehivavy janga i Tiro hoe:

¹⁶Makà lokanga ka miveziveze manerana ny tanàna ianao, ry Ikala janga hadino! Mitendre tsara ka mahereza mihira mba hahatsiarovana anao!

¹⁷Rehefa afaka fitopolo taona dia hamangy an’i Tiro NY TOMPO ka hiverina amin’ny filan-karama maloto izy sady hijangajanga amin’ny fanjakana rehetra etỳ ambonin’ny tany.

¹⁸Ary ny tombom-barony sy ny karama maloto azony dia hohamasinina ho an’NY TOMPO; tsy hotahirizina na horaketina izany fa ny tombom-barony dia ho an’izay mitoetra eo anatrehan’NY TOMPO, ho hani-mahavoky sy ho fitafiana mirenty.