Read La Bible en Malgache Isaia 24 Bible Online

Isaia 24 - La Bible en Malgache bible

Isaia 24

¹Indro NY TOMPO manafoana ny tany ka mahalao azy, mampihohoka azy Izy ka mampiely ny mponina ao aminy.

²Ho sahala ihany ny hanjo ny mpisorona sy ny vahoaka, ny tompolahy sy ny mpanompolahiny, ny tompovavy sy ny mpanompovaviny, ny mpivarotra sy ny mpividy, ny mpampisambotra sy ny mpisambotra, ny mpampitrosa sy ny mpitrosa.

³Ho foana tanteraka ny tany, tena horobaina manontolo izy, fa NY TOMPO no efa miteny izany.

⁴Misaona sy malazo ny tany, milofika sy malazo izao tontolo izao, milofika ny olona ambony amin’ny tany.

⁵Novetavetain’ny mponina ao aminy ny tany satria nandika ny lalàna izy sady nanodinkodina ny didy ary nivadika tamin’ny Fanekena mandrakizay.

⁶Ary noho izany dia ozona no mandevona ny tany ary hilanja ny valin-kelony ny mponina ao aminy; voadoro ny mponina amin’ny tany ka olona vitsy foana no sisa ao.

⁷Misaona ny ranom-boaloboka, milofika ny foto-boaloboka; misento avokoa ireo izay nifaly am-po;

⁸Mitsahatra ny firavoravoana amin’ny ampongatapaka, tapitra ny fitabataban’ireo niravoravo; mitsahatra ny fifaliana amin-dokanga;

⁹Tsy misy mihira eo am-pisotroan-divay intsony, mangidy amin’izay misotro azy ny toaka.

¹⁰Rava ilay tanàna be fikorontanana. Mirindrina ny trano rehetra ka tsy azon’olona idirana;

¹¹Misy fitarainana eny an-tsaha satria tsy misy ny divay, nihamaizina ny fifaliana rehetra, voaroaka ny firavoravoan’ny tany.

¹²Fahafoanana no hany sisa ao an-tanàna ary rava sady montsamontsana ny vavahady.

¹³Fa ao anivon’ny tany, ao amin’ny olona, dia hisy toy ny amin’ny fikapohana hazo oliva sy fitsimpontsimponam-boaloboka rehefa tapitra ny andro fiotazana azy.

¹⁴Ireo dia hanandratra ny feony ka hihoby; noho ny fahalehibiazan’NY TOMPO dia hiantso mafy eny amin’ny ranomasina izy ireo!

¹⁵Mankalaza NY TOMPO any amin’ny fiposahan’ny mazava izy, dia ny anaran’NY TOMPO, Andriamanitry ny Israely, any amin’ny nosy any an-dranomasina!

¹⁶Hatrany am-paran’ny tany no nandrenesanay hira hoe: Voninahitra ho an’ny marina! Fa hoy kosa aho: Levona aho! Levona aho! Lozako! Ny mpamitaka dia mamitaka; Eny, ny mpamitaka dia mamitaka tokoa!

¹⁷Tahotra sy lavaka ary fandrika no mahazo anao, ry mponina amin’ny tany!

¹⁸Izay mandositra noho ny fandrenesana ny tahotra dia ho latsaka any an-davaka; izay miakatra avy ao anatin’ny lavaka dia ho voarain’ny fandrika; fa misy varavarana mivoha any amin’ny avo, ary mihovotrovotra ny fanorenan’ny tany.

¹⁹Mivava ny tany, mitresaka ny tany, mihovotrovotra aoka izany ny tany,

²⁰mivembena dia mivembena tahaka ny olona mamo ny tany, mihevaheva toy ny trano fialofana mihantona, mitambesatra aminy ny fahadisoany ka potraka izy ary tsy ho tafarina intsony.

²¹Amin’izany andro izany dia any ambony no hamalian’NY TOMPO ny tafiky ny lanitra, ary etỳ an-tany kosa ny mpanjakan’ny tany.

²²Dia hangonina tahaka ny mpifatotra ao an-davaka izy ireo ka hohidina any an-tranomaizina. Ary rehefa afaka andro maro dia hampamoahina izy.

²³Dia hivoaramena ny volana ary hivaloarika ny masoandro, satria Andriamanitra, Tompon’izao rehetra izao, no Mpanjaka ao an-tendrombohitra Ziona*, any Jerosalema, ary misy voninahitra eo anatrehan’ny loholony.