Read La Bible en Malgache Isaia 25 Bible Online

Isaia 25 - La Bible en Malgache bible

Isaia 25

¹TOMPO ô, Andriamanitro Ianao; hanandratra Anao sy hidera ny anaranao aho, fa nahavita zava-mahagaga Ianao, zavatra efa voakasa hatramin’ny ela sady azo antoka no mafy orina.

²Fa nataonao tonga korontam-bato ny tanàna; ilay tanàna mimanda dia tena rava tanteraka; ny lapan’ny hafa firenena dia tsy hita tao an-tanàna intsony; tsy hatsangana mandrakizay intsony ireo.

³Noho izany dia hankalaza Anao ny firenena matanjaka, hatahotra Anao ny tanànan’ny firenena mpampihorohoro.

⁴Fa fiarovana mafy ho an’ny reraka Ianao; eny, fiarovana mafy ho an’ny mahantra ao amin’ny fahoriany, fialofana amin’ny oram-batravatra, alokaloka amin’ny hainandro; fa ny fahatezeran’ny mpampihorohoro dia tahaka ny orana mivatravatra mamely ny rindrina.

⁵Tahaka ny fandresenao ny hainandro izay mamely ny tany karankaina no andresenao ny fitabataban’ny firenena hafa; eny, tahaka ny hainandro resin’ny aloky ny rahona matevina no andresena ny fanakoran’ny mpampihorohoro.

⁶Andriamanitra, Tompon’izao rehetra izao, dia hanao fanasana ho an’ny firenena rehetra eto amin’ity tendrombohitra ity; fanasana amin’ny hena matavy, fanasana amin’ny divay efa niotrika ela, hena matavy, be tsoka, divay efa niotrika ela, voadio tsara.

⁷Eto amin’ity tendrombohitra ity no hanafoanany ny sarona izay manakona ny olona rehetra sy ny rakotra izay mandrakotra ny firenena rehetra;

⁸hofoanany tsy hisy mandrakizay ny fahafatesana; NY TOMPO Andriamanitra no hamafa ny ranomaso amin’ny tava rehetra sady hanafoana eny amin’ny tany rehetra ny fahafaham-baraka amin’ny olony. NY TOMPO no niteny.

⁹Holazaina amin’izany andro izany hoe: Indro Andriamanitsika izay nantenaintsika hamonjy antsika. Indro NY TOMPO izay nandrasantsika, koa aoka isika hifaly sady hiravoravo amin’ny famonjeny!

¹⁰Fa mipetraka amin’ity tendrombohitra ity ny tanan’NY TOMPO; ary hohosihosena ao amin’izay misy azy i Moaba, tahaka ny fanosihosy ny mololo miavosa amin’ny rano ao am-pahitra;

¹¹hamelatra ny tanany ao anatin’izany izy, tahaka ny famelatry ny mpilomano ny tanany raha milomano; fa NY TOMPO kosa mampietry ny fiavonavonany sy ny fahamailamailaky ny tanany.

¹²Harodany sy haetriny ny mandanao mafy sy avo ka hataony mikasika amin’ny tany sy mihosom-bovoka.