Read La Bible en Malgache Isaia 26 Bible Online

Isaia 26 - La Bible en Malgache bible

Isaia 26

¹Amin’izany andro izany dia hohiraina eto amin’ny tanin’i Joda izao hira izao: Manana tanàna mafy isika; famonjena no napetraky NY TOMPO ho manda sy fiarovana.

²Vohay ny vavahady mba hidiran’ny firenena marina izay mitana ny fahamarinana.

³Ny olona tsy miovaova hevitra dia harovanao ao anatin’ny fiadanana tanteraka, satria matoky Anao izy.

⁴Matokia NY TOMPO mandrakizay, fa NY TOMPO, NY TOMPO no Vatolampy mandrakizay.

⁵Naetriny ny olona avo toerana; ny tanàna avo dia arodany; eny, arodany ho amin’ny tany ka ataony mihosom-bovoka.

⁶Hitsahin’ny tongotra izy, dia ny tongotry ny ory sy ny faladian’ny mahantra.

⁷Mahitsy ny lalan’ny marina; eny, Ianao izay mahitsy no manamora ny alehan’ny marina.

⁸Koa amin’ny lalan’ny fitsaranao, TOMPO ô, no anantenanay Anao. Ny hahatsiaro Anao sy ny anaranao, izany no irinay indrindra.

⁹Maniry Anao aho nony alina; eny, ny fanahiko ato anatiko no itadiavako Anao fatratra; fa raha mamely ny tany ny fitsaranao dia mianatra fahamarinana ny mponina amin’izao tontolo izao.

¹⁰Na dia asiana soa aza ny ratsy fanahy dia tsy mety mianatra fahamarinana; eny, mbola manao meloka ihany izy na dia ao amin’ny tanin’ny fahamarinana aza ka tsy mety mijery ny fahalehibiazan’NY TOMPO.

¹¹TOMPO ô, avo ny tananao ka tsy jeren’ireo; Tsy maintsy ho jereny ihany anefa ny fahasaro-piaronao amin’ny olonao ka ho menatra izy; eny, afo no handevona ny fahavalonao.

¹²TOMPO ô, manorina fiadanana ho anay Ianao; fa ny asanay rehetra dia tanterahinao ho anay.

¹³TOMPO Andriamanitray ô, tsy Ianao ihany no efa nampanompo anay fa nisy tompo hafa koa; nefa Ianao irery ihany no ahazoanay mankalaza ny anaranao.

¹⁴Ny maty dia tsy ho velona intsony, ny matoatoa dia tsy mba hitsangana; koa novalinao izy ka naringanao, sady nofoananao avokoa ny fahatsiarovana azy!

¹⁵Nampitombo ny firenena Ianao, TOMPO ô! Eny, nampitombo ny firenena Ianao ka nahazo voninahitra ho Anao; nitarinao avokoa ny faritry ny tany.

¹⁶TOMPO ô, nitady Anao izy ireo nony azom-pahoriana; nanao vavaka tora-po izy nony iharan’ny famaizanao.

¹⁷Tahaka ny vehivavy bevohoka efa madiva hiteraka ka miolanolana sy mitaraina noho ny faharariany, dia tahaka izany izahay teo imasonao, TOMPO ô!

¹⁸Efa bevohoka izahay, efa nihetsi-jaza izahay, nefa tahaka ny nitera-drivotra izahay; tsy nahavita famonjena ho an’ny tany izahay, ary tsy niteraka mponina ho an’izao tontolo izao.

¹⁹Ho velona indray ny olonao izay efa maty! Hitsangana ny fatin’ny oloko! Koa mifohaza sy mihobia ianareo izay mandry ao amin’ny vovoka! Fa ny andonao dia tahaka ny andon’ny fahazavana, ary ny tany dia hiteraka ny maty.

²⁰Mandehana, ry oloko, midira ao amin’ny efitranonao, ary mirindrìna varavarana ianao; miere kely indray mipy maso monja mandra-pahalasa ny fahatezerana.

²¹Fa indro NY TOMPO mivoaka avy amin’ny fitoerany hampamoaka ny mponina amin’ny tany ny helony; hampiseho ny ra izay nofohiny ny tany ka tsy hanafina intsony ny olona izay novonoina teo aminy.