Read La Bible en Malgache Isaia 27 Bible Online

Isaia 27 - La Bible en Malgache bible

Isaia 27

¹Amin’izany andro izany, ny sabatry NY TOMPO, izay mafy sady lehibe no mahery, no hoentiny mamaly ny leviatana*, ilay menarana mandositra, ny leviatana, ilay menarana miolikolika, ary hovonoiny ilay dragona* ao an-dranomasina.

²Amin’izany andro izany no hihiranareo ny amin’ny tanim-boaloboka ahazoana divay mahery hoe:

³Izaho TOMPO no mpiaro io, isaky ny indray mipy maso no anondrahako azy, fandrao misy manimba azy, dia miambina azy Aho na andro na alina.

⁴Tsy misy fahatezerana ato Amiko. Enga anie ka hisy anjavidy sy tsilo eto anatrehako mba hiadiako! Hohitsakitsahiko ireo ka hodorako avokoa!

⁵Fa raha tsy izany dia aoka hanao Ahy ho fiarovana mafy kosa izy ka hihavana Amiko; eny, aoka hihavana Amiko izy!

⁶Amin’ny andro ho avy dia hiorina tsara i Jakoba; ary hamony sy hitsimoka Israely ka hameno izao tontolo izao amin’ny vokany.

⁷Moa tahaka ny namelezana izay namely azy va no mba namelezany azy koa? Tahaka ny namonoana izay novonoiny va no mba namonoana azy koa?

⁸Tamin’ny nandroahana azy, tamin’ny famoahana azy tany ivelany no nitsarana azy; nokororohiny tamin’ny rivony mahery izy tamin’ny andron’ny rivotra avy any atsinanana.

⁹Ka izao no hamelana ny helok’i Jakoba, ary izao ihany no vokatry ny fanesorana ny fahotany: Ny hanaovany ny vato rehetra amin’ny alitara ho tahaka ny vato sokay voatorotoro, ary ny tsangankazon-tsampy ho an’ny Aseraha* sy ny tsangambato ho an’ny masoandro dia tsy hitsangana intsony.

¹⁰Fa hitoka-monina ny tanàna mimanda ka ho fonenana afoy sy ilaozana tahaka ny tany efitra; ao no hihinanan’ny zanak’omby sy handriany ary handaniany ny rantsan-kazony.

¹¹Raha malazo ny rantsany dia hotapatapahina ka ho avy hitaina azy ny vehivavy. Satria firenena tsy manam-pahalalana izy, dia tsy hiantra azy ny Mpanao azy ary tsy hamindra fo aminy ny Mpamorona azy.

¹²Amin’izany andro izany dia hahintsan’NY TOMPO hatreo amin’ny ony Eofrata mandriaka ka hatramin’ny lohasahan-driakan’i Ejipta ianareo ary samy hotsimponina tsirairay ianareo, ry Zanak’Israely!

¹³Amin’izany andro izany dia hotsofina ny anjomara lehibe; dia ho avy izay very tany amin’ny tany Asiria sy izay efa niely tany amin’ny tany Ejipta ka hiankohoka eo anatrehan’NY TOMPO eo amin’ny tendrombohitra masina, ao Jerosalema.