Read La Bible en Malgache Isaia 28 Bible Online

Isaia 28 - La Bible en Malgache bible

Isaia 28

¹Lozan’ny satroboninahitra, izay reharehan’ny mpimamo ao Efraima, sy ny voninkazo mihamalazo amin’ny firavany tsara tarehy, izay eo an-dohan’ny lohasaha lonaky ny olona mamon-divay.

²Indro ny Tompo manana izay mahery sy matanjaka, tahaka ny rivo-kavandra sy ny tafio-drivotra mandoza; tahaka ny fandriaky ny ranobe manafotra, no hanjerany azy mafy ho amin’ny tany.

³Dia hohitsahin’ny tongotra ny satroboninahitra izay reharehan’ny mpimamo ao Efraima;

⁴ary ny voninkazo mihamalazo amin’ny firavany tsara tarehy izay eo an-dohan’ny lohasaha lonaka, dia ho tahaka ny voan’aviavy masaka alohan’ny fotoana, alohan’ny fahavaratra, koa izay mahita azy dia mandray, ary raha vao raisiny dia arapany.

⁵Amin’izany andro izany dia Andriamanitra, Tompon’izao rehetra izao no ho satroboninahitra tsara tarehy sy ho fehiloha firavaka ho an’ny olony sisa.

⁶Ho fanahy fitsarana ho an’izay mipetraka eo amin’ny fitsarana Izy, sady ho hery ho an’izay mampihemotra ny ady izay tonga eo am-bavahady.

⁷Nefa izy ireo dia fanimpanina azon’ny divay, ary mivembena azon’ny toaka; fanimpanina azon’ny toaka ny mpisorona sy ny mpaminany; resin’ny divay ireo, mivembena azon’ny toaka; fanimpanina amin’ny fahitana izy ary miroaroa saina ny amin’ny didim-pitsarana avoakany.

⁸Feno loa sy loto ny latabatra rehetra ka tsy misy madio hitoerana intsony.

⁹Iza no hampianariny fahalalana? Ary iza no hanazavany lesona? Zaza vao nosaraha-nono va? Zaza vao nitsaha-ninono va?

¹⁰Fa didy anampy didy, didy anampy didy; fitsipika anampy fitsipika, fitsipika anampy fitsipika; ampiana teny kely etsy, ampiana teny kely eroa.

¹¹Hay, amin’ny molotra miambakavaka sy amin’ny teny vahiny no hitenenany amin’ity firenena ity.

¹²Izy ilay nilaza taminy hoe: Izao no fitsaharana! Ampitsaharo ny reraka! Izao no fotoana hialan-tsasatra! Nefa tsy nety nihaino ireo.

¹³Ary ho azy ireo, ny tenin’NY TOMPO dia hoe: Didy anampy didy aminy tokoa; eny, didy anampy didy, fitsipika anampy fitsipika, fitsipika anampy fitsipika; ampiana teny kely etsy, ampiana teny kely eroa, dia ho solafaka izy rehefa mandeha ka ho torotoro sy ho voafandrika ary ho voasambotra.

¹⁴Koa mihainoa ny tenin’NY TOMPO ianareo, ry mpaniratsira, ianareo izay mitondra ity firenena eto Jerosalema ity!

¹⁵Satria miteny ianareo hoe: Efa nanao fanekena tamin’ny fahafatesana izahay ary efa nanao fifanarahana tamin’ny fitoeran’ny maty*; koa na dia ho avy aza ny loza manafotra dia tsy hihatra aminay izany, satria ny lainga no nataonay ho fialofana ary ny fitaka no ho fierena.

¹⁶Noho izany dia izao no lazain’NY TOMPO Andriamanitra: Indro Izaho no nametraka vato ao Ziona*, vato voazaha toetra, vato tsara izay fehizoro voaorina ho fanorenana mafy ka tsy mba ho taitra izay mitoky aminy.

¹⁷Ny fitsarana marina no hataoko ho fitsipika, ary ny fahamarinana no ho fandrefesana marindrano; hopaohin’ny havandra ny lainga fialofana, ary hindaosin’ny rano ny fierena.

¹⁸Hofoanana ny fifanekenareo amin’ny fahafatesana ary tsy haharitra ny fifanarahanareo amin’ny fitoeran’ny maty; rehefa ho avy ny loza manafotra dia hohitsakitsahany ianareo.

¹⁹Ary na oviana na oviana no hiaviany dia hahatratra anareo izany; fa isa-maraina no hiaviany, amin’ny andro sy amin’ny alina koa; ary ny vokatry ny fandrenesana izany dia horohoro lehibe.

²⁰Fa fohy loatra ny farafara ka tsy azon’ny olona iamparana; ary kely ny firakotra ka tsy maharakotra, raha misy te hirakotra azy.

²¹Fa NY TOMPO hitsangana tahaka ny teo amin’ny tendrombohitra Perazima, ho tezitra tahaka ny teo amin’ny lohasahan’i Gibeona Izy mba hanaovany ny asany, dia ny asany mahagaga, mba hahavitany ny ataony, dia ny ataony izay mahatalanjona.

²²Koa aza maniratsira intsony ianareo, fandrao vao mainka ho mafy ny famatorana anareo. Fa fahafonganana no voatendry hamelezana ny tany rehetra; izany no reko tamin’NY TOMPO, Andriamanitra Tompon’izao rehetra izao.

²³Atongilano ny sofinareo ka henoy ny feoko! Tandremo ka mihainoa ny teniko!

²⁴Moa ny mpiasa tany va miasa mba hamafy mandrakariva? Miasa sy mandravona ny taniny mandrakariva va izy?

²⁵Fa rehefa voaravony tsara ny tany, moa tsy afafiny amin’izay va ny voan’ny nigela ary tsy apariakany va ny komina, tsy alahany mitandahatra tsara va ny varimbazaha sy ny varimbazaha hafa amin’ny tany voafaritra ho azy ary ny ampemby kosa eny an-tsisiny?

²⁶Andriamaniny no manoro azy izay tokony hataony; eny, Izy no mampianatra azy.

²⁷Fa tsy ny ragiragy vy no anosihosena ny nigela, ary tsy ny kodiaran’ny sarety no akodiadia amin’ny komina; fa ny nigela dia hosihosena amin’ny tsorakazo, ary ny komina amin’ny tehina.

²⁸Torotoroina ny vary hatao mofo fa tsy hosena tsy an-kijanona akory izany; raha ampandehanana ny kodiaran’ny sarety sy hosen’ny soavaly izy dia tsy ho torotoro.

²⁹Izany koa dia avy amin’Andriamanitra, Tompon’izao rehetra izao; fa mahagaga amin’ny fikasany Izy, ary mahatalanjona amin’ny fahendreny!