Read La Bible en Malgache Isaia 29 Bible Online

Isaia 29 - La Bible en Malgache bible

Isaia 29

¹Lozan’i Ariela[9], dia i Ariela, tanàna nitobian’i Davida! Ampio taona ny taona, aoka ho tafatsingeringerina ny andro firavoravoana,

²dia hampahory an’i Ariela Aho; hisy fisentoana sy fitarainana ao aminy; ary ho tonga fatana alitara tokoa izy Amiko.

³Hitoby manodidina anao Aho ka hasiako miaramila hanao fahirano anao ary hanangana manda aho mba hamelezana anao.

⁴Dia haetry ianao ka hiteny avy ao amin’ny tany ary avy ao amin’ny vovoka no hibitsibitsihanao; eny, hivoaka avy amin’ny tany tahaka ny an’ny mpiantso ny fanahin’ny maty ny feonao ary avy ao amin’ny vovoka no hibitsibitsihanao ny teninao.

⁵Kanefa ho tonga tahaka ny vovoka madinika ny fahavalonao betsaka, ary ho tahaka ny akofa entin-drivotra ny mpampihorohoro maro; eny, ho avy tampoka dia tampoka izany.

⁶Avy amin’Andriamanitra, Tompon’izao rehetra izao, ny famaliana, amin’ny kotrokorana sy horohoron-tany ary feo mahery, tadio sy tafio-drivotra ary lelafo mandevona.

⁷Ho tahaka ny fahitana amin’ny nofy amin’ny alina ireo firenen-drehetra izay mivory hamely an’i Ariela, dia izay rehetra mivory hamely azy sy ny mandany ka hampahory azy.

⁸Dia ho tahaka ny olona noana izay manonofy mihinana, kanjo nony mahatsiaro izy dia foana ihany ny kibony; na koa tahaka ny olona mangetaheta izay manonofy misotro, kanjo nony mahatsiaro izy dia indro, ana sady mbola mangetaheta ihany; ho tahaka izany ny firenena rehetra izay mivory hamely ny tendrombohitra Ziona*.

⁹Mijanòna ianareo ka mitalanjòna! Tampeno ny masonareo, ary aoka ianareo ho jamba! Mamo ireo nefa tsy tamin’ny divay; mivembena izy nefa tsy noho ny toaka.

¹⁰Fa NY TOMPO efa nampidina fanahy mahasondrian-tory ao aminareo, efa nakimpiny ny masonareo mpaminany ary efa nosaronany ny lohanareo mpahita.

¹¹Aminareo ny fahitana ny amin’izany rehetra izany dia tahaka ny teny amin’ny taratasy voaisy tombo-kase izay atolotra olona mahavaky teny ka ilazana hoe: Miangavy anao aho, vakio ity! Hoy anefa izy: Tsy azoko vakina ity satria voaisy tombo-kase.

¹²Fa raha atolotra izay tsy mahavaky teny kosa izany ka atao hoe: Miangavy anao aho, vakio ity! Dia hamaly izy hoe: Tsy mahay mamaky teny aho.

¹³Ary hoy ny Tompo: Satria manatona Ahy amin’ny vavany ity firenena ity sy mankalaza Ahy amin’ny molony, nefa ampanalaviriny Ahy kosa ny fony, ny fahatahorany Ahy dia didin’olombelona ampianarina azy ihany.

¹⁴Noho izany dia mbola hanao zava-mahagaga amin’ity firenena ity indray Aho, dia zava-mahagaga sy mahatalanjona; ho foana ny fahendren’ny olon-kendriny, ary tsy ho hita ny fahalalan’ny manampahaizana eo aminy.

¹⁵Lozan’izay miafina lalina mba tsy ho hitan’NY TOMPO ka manafina ny fikasany! Ao amin’ny maizina ny asany ka hoy izy: Iza no mahita antsika, ary iza no mahalala antsika?

¹⁶Endre izato hadalanareo! Moa ny mpanefy tanimanga va no hoheverina ho tahaka ny tanimanga, ny novolavolaina va hilaza izay namolavola azy hoe: Tsy namolavola ahy izy? Na ny zavatra voaforona va hilaza izay namorona azy hoe: Tsy manam-pahalalana izy?

¹⁷Tsy vetivety foana va dia hovana ho saha mahavokatra i Libanona, ary ny saha mahavokatra dia hoheverina ho ala?

¹⁸Amin’izany andro izany dia ho ren’ny marenina ny lazain’ny boky; ary na dia ao amin’ny haizina sy ny haizim-pito aza dia hahita ihany ny mason’ny jamba.

¹⁹Hitombo hafaliana amin’NY TOMPO ny ory; ary ny mahantra ao amin’ny olona dia hiravoravo amin’ny Iray Masin’ny Israely.

²⁰Fa tapitra ny mpampihorohoro, tsy ao intsony ny mpaniratsira; ary fongotra izay rehetra tsy misaina afa-tsy ny hanisy ratsy,

²¹dia ireo izay manameloka olona amin’ny teny, ary mamandrika izay mananatra eo am-bavahady sady mamadika tsy amin’antony ny marina.

²²Noho izany dia izao no lazain’NY TOMPO izay nanavotra an’i Abrahama, izao no lazainy amin’ny taranak’i Jakoba: Tsy hitsanga-menatra intsony i Jakoba ary tsy hivaloarika intsony ny tavany.

²³Fa rehefa hitan’ny zanany ny asan’ny tanako eo anivon’izy ireo dia hanamasina ny anarako izy; eny, hanamasina ny Iray Masin’i Jakoba izy ary hangovitra eo anatrehan’Andriamanitry ny Israely;

²⁴ny fanahy diso lalana dia mbola hahazo fahalalana, ary izay mimonomonona dia mbola hahazo lesona hampahendry azy.